13 Shilde, 20:43 505 0 Qoǵam Araılym Bımendıeva

Qydyráli Bolman: Memleket ár adamdy aman alyp qalýǵa janyn salýy qajet

Qydyráli BOLMAN, ánshi, prodıýser:

–  Keshe ǵana aramyzda júrgen, búginde ómirden ótip ketken jaqsy adamdardyń jandary jánnatta bolǵaı! Dál qazir, El men Úkimet bútin bolǵanda ǵana, isimiz berekeli bola alatyny anyq! Memleketimiz bar resýrstaryn tárk etse de, Qazaqstannyń ár adamyn aman alyp qalýǵa janyn salýy qajet! Halyqqa jetkilikti qylyp ottegi apparatyn, kerekti dári-dármek, qarapaıym shprıterdiń bárin tegin taratý sharasyn tez arada iske asyryp, jetkilikti em oryndaryn qamtamasyz etsek, qansha adamdy qutqaryp qalýǵa bolar edi.

Prezıdentimiz Qasym-Jomart Kemelulymen barshamyz birige otyryp, memleket pen birge halyq kúsh biriktirip, barymyzdyń bárin salyp, ár adamdy aman-esen alyp qalýǵa jumsaýymyz kerek. Bul eń ózekti taqyrypqa aınalyp, kún tártibinen túspeýi qajet! Qarajattyń ysyrap bolmaýyn birneshe deńgeıde qatty qadaǵalaý bolǵany lázim. Qoımada bar dári-dármekterdi shuǵyl túrde dárihanalarǵa arbamen tasysaq ta, kún-tún demeı taratylýy tıis. Bir adamdy saqtap qalý, búkil álemdegi adamdardy saqtap qalýmen teń. Ár memlekettiń tuǵyry, eń basty baılyǵy – sol memlekettiń halqy, árbir adamy. Ár aýrýhanany kúnde aralaıtyn, ár dárihanaǵa baryp baqylaý jasaıtyn, «dári bar ma, joq pa?» degen eń ózekti máseleni sol jerde sheshe alatyn, memleketine jany ashıtyn, ár adamǵa janashyr adal, eńbekqor, patrıottardan quralǵan quzyrly «mehanızm» qajet. Dáriniń bárin tegin taratýǵa kóshý kerek, memleketimizdiń oǵan shamasy jetetinine kúmánim joq. Ózderi qınalyp otyrǵan halyqqa dári-dármekti 5 ese qymbat qylyp satý, ony defııt etý degen tipti eshqandaı aqylǵa syımaıdy.

Adamdardyń neden qaıtys bolyp jatqanyna nege saraptama júrgizilmeıdi? Qaıtqan adamdardyń bárine 100% bir dıagnoz qoıylýy qanshalyqty durys? Basqa elder indetke qarsy turyp, esin jıyp, tirshiligine kirisip jatqanda, biz ónbeıtin daý qýalap, qalǵan adamdardy aman alyp qalýǵa naqty qadamdar jasaıtyn altyn ýaqytty dalaǵa shashyp, qol qýsyryp otyrǵan joqpyz ba?

Osy keptelip turǵan suraqtardy sheshý joldary meılinshe aıqyn, meılinshe ashyq júrgizilip, el kórip-bilip otyratyn dúnıege aınalýy kerek. Máseleniń túp-tamyryna úńilmesek, bári beker... Dál qazir bizdiń Úkimet halyqty, ár aýrýhanany, ár dárihanany, árbir adamdy kúndelikti «estýi» alǵa jyljýdyń, elimizdi qutqarýdyń jalǵyz jáne eń ózekti tetigi bolmaq.

Sońǵy jańalyqtar