13 Shilde, 11:42 442 0 Qoǵam Araılym Bımendıeva

Esep aıyrysyp, ókpe qýatyn emes, ómir úshin kúresetin ýaqyt – Baıanǵalı Álimjanov

Baıanǵalı ÁLIMJANOV, aqyn, dramatýrg, QR mádenıet qaıratkeri:

Kelgen indet búkil halyqtyń densaýlyǵyna qaýip-qater týdyryp otyr. Pandemııa, kerek deseńiz, búkil adamzattyq qasiretke aınaldy. Biz ne bolyp jatqanyn túsinbeıtin, beımálim bir jańa zamanǵa tap bolǵan sııaqtymyz. Arǵy túbinen oılasaq, jaýdy jeńý úshin bir el ekinshi elge bakterıologııalyq qarý qoldanǵanyn tarıhtan bilemiz. Al myna derttiń qaıdan, qalaı kelip jatqanyn, ádeıi jasaldy ma, joq pa, túsiný qıyn. Bizdiń urpaq neshe túrli qıyndyqty kórip ósti, biraq dál mundaı sumdyq, dál mundaı qıyn, qasiret jaǵdaı bolǵan emes. Beıbit zamanda óte qaýipti, qaterli soǵys jaǵdaıy oryn alyp otyr.

Densaýlyq saqtaý salasyndaǵy qatelikter aldaǵy kúnimizge sabaq bolýy tıis. Biraq dárigerler kúni-túni maıdannyń shebinde jankeshtilikpen eńbek etip, qolynan kelgenin jasap jatyr. Óziniń emdelýshisinen aýrý juqtyryp qaıtys bolǵan abzal jandar qanshama. Bizdiń dárigerler qaýymy baıaǵy ekinshi dúnıejúzilik soǵysta maıdanda gospıtalda júrgen sanıtarlar sekildi. Qaýip-qatermen kún saıyn betpe-bet keledi. Jaralylardy qutqaram dep júrip talaı sanıtar bomba túskende ajal qushty.

Sońǵy kúnderi belgili bolǵan bar dárini qoımaǵa tyǵyp qoıý nemese ony qymbat satý degen jaǵdaılar tipti aqylǵa syımaıdy, adamdyqtan ketkenderdiń tirligi der edim. Biraq olarǵa qarap búkil memlekettiń, Úkimettiń jasap jatqan sharalaryn joqqa shyǵaryp, búlinshilikke ushyraǵanymyz durys bolmas. Jalpy mundaı jaǵdaıǵa birde-bir memleket daıyn bolmady. Qazaqstan da sol sekildi. Aýzyn aıǵa bilegen Amerıkanyń ózinde indetten birneshe myńdaǵan adam qaıtys boldy. Emi joq aýrýmen kúreste túgel bir otbasy qaıtys bolǵan jaǵdaılar da kezdesip jatyr. Osy aýrýdyń qıyndyǵyn kórmegen birde-bir otbasy joq shyǵar qazir.

Tótenshe jaǵdaıdan keıin karantın sharalaryn saqtamaı erkinsip ketkenimiz ras. Týystarymyzǵa barmasaq, qol alyspasaq, qushaqtamasaq, bir tabaqtan as ishpesek, toı toılamasaq bolmaıtyn sııaqty kórindi. Kózge kórinbeıtin soǵystyń júrip jatqanyn elemedik. Saýmyn dep turǵan jaqyn adamyńnan aýrý juqtyra ketýiń ońaı. Endi qazaqtyń burynǵydaı arqa-jarqa otyrysy, alashapqyn jınalysy, toıdan toı aralap júretin zamany qaıtyp kele ma, joq pa, belgisiz. Jıyn-toıdy ýaqytsha toqtatatyn kez keldi, myna zaman ondaıdy kótermeıdi. Qaýip tónip turǵanda toı toılaý aqylǵa syımaıdy.

Búgingi ýaqyt esep aıyrysatyn, ókpe qýatyn ne birin-biri túrtpekteıtin kezeń emes. Bul bárimiz qosylyp, búkil halyq bolyp ómir úshin kúresetin, ólimge qarsy turatyn, bir atanyń balasyndaı jumylyp, myna dertten tezirek qutylýdyń qamyn jasaıtyn kezeń. Birimizge birimiz súıenish, taıanysh bolýymyz kerek. Búgingi qalyptasqan jaǵdaıdy kórip otyryp janym aýyrady. Bar qolymnan keletini sózben, óleń-jyrmen halyqqa jiger berý. Sosyn tártipke baǵynyp, úıde otyrý. Bul – indetti ary qaraı taratpaýdyń tıimdi joly. Etek-jeńimizdi jınap, barynsha saqtanýymyz kerek. Alla bále-jaladan saqtasyn. Jaqynynan aıyrylǵan barlyq otbasyna kóńil aıtamyn. Ómirden ozǵan baýyrlarymyzdyń aldy jaryq, arty qaıyrly bolsyn.

Sońǵy jańalyqtar