9 Shilde, 09:42 1153 0 Qoǵam Anar LEPESOVA

Dárihana basshysy tekserýge kelgen depýtatty syrtqa qýyp shyqty

Almatyda dárihanalar preparattardy óz baǵasynan eki ese qymbatqa satyp jatyr. Buǵan sybaılas jemqorlyqqa qarsy monıtorıng qyzmeti kóz jetkizdi.

Reıd kezinde áleýmettik ara qashyqtyq saqtalmaǵany anyqtaldy. Tipti saǵattap kezekte turǵandardyń izdegen dárileri tabylmaı, bary qymbat baǵaǵa satylyp jatyr, dep habarlady KTK.

Tosynnan kelgen tekserýshilerdi kútpegen mundaǵylar biraz ábigerge tústi. Tipti dárihana basshysynyń ózi synaı kelgen qyzmetkerler men depýtatty dalaǵa alyp shyqty. Sóıtip, "talapqa saı jumys istep jatyrmyz" dep tyrashtanǵandar dári baǵasy bekitilgen qaǵazdy kórsetýden bas tartty.

"Joq, ruqsat bermeımin. Barlyǵy jumys istep jatyr. Kezekke turyńyz da, baǵasyn bilińiz. Biz tek qala ákimdigine baǵynamyz jáne tek solarǵa esep beremiz. Al sizderge munda aıtyp turmaımyz".

Dárihana basshylarynyń reıdke kelgenderdi syrtqa qýyp shyqqany bylaı tursyn, tipti jaı ǵana dáriniń baǵasyn bilý úshin de kezek kútý keregin aıtty. Uzyn-sonar kezekte saǵattap turýǵa týra keledi.

Osylaısha ázer degende ishke kirgen mamandarǵa "baǵany baqylaýda ustap otyrmyz, shekti baǵada shekten shyqpadyq" deıdi. Sondaı-aq, mundaǵy keıbir dáriniń joqtyǵyna halyqtyń ózin kinálap otyr.

"Paraetamol 125 teńge. Sýmamed 5600, zıtmak 4900 teńge. Bul aıtyp turǵan baǵalarym 500 mg. Tamıflıý 9990 teńgeden boldy. Biraq qazir joq. Gıparen de joq. Suranystaǵy dáriler kele salysymen, bir-aq kúnde taýsylyp ketýde. Óıtkeni adamdar kóptep satyp alady da, ózgelerge jetpeı qalady", - ep túsindirdi bólim meńgerýshisiniń orynbasary Oksana Alıeva.

Osylaısha dertine daýa izdegender dárihanalardy kezýge májbúr. Tańerteńnen beri kún astynda turyp kútkenderdiń izdegeni tabylmaı,  ýaqyty zaıa ketýde.

"Mine, búgin saǵat 10-nan beri dárihana aralap júrmin. Bul 15-shi dárihanam. Ortalyq dárihanaǵa kelip turmyn. Eshqandaı dári joq. Tek paraetamol bar deıdi. Izdegen dárimniń eshqaısysy joq. Paraetamol úshin úsh saǵat boıy kezekte turmyn", - deıdi qala turǵyny.

Ekinshi dárihanada da jaǵdaı dál osylaı. Uzyn-sonar kezek. Qaptaǵan qarasha halyq. Munda da qabaǵy qar jaýǵan basshylyq dáriniń baǵasyna shań jýytpady. Al synaı barǵandar máseleni bulaı qaldyrmaımyz dep ashýly.

"1800 teńge turatyn antıbıotık qazir 2600 teńgeden satylyp jatqanyn baıqadyq. Barǵan dárihanalardan dáriler baǵasynyń bekitilgen qaǵazyn suradyq. Barlyǵynda joq degen jaýap. Demek óz betimen baǵa qoıyp, qymbatqa satýy ǵajap emes. Bul jaǵdaıdy shuǵyl túrde ózgertip, sheshimin tabý kerek. Endi ákimdik pen ishki ister mınıstrlikterine resmı hat joldaıtyn bolamyz", - dep atap ótti parlament májilisiniń depýtaty Irına Smırnova.

 

Sońǵy jańalyqtar