8 Shilde, 14:38 445 0 Qoǵam Anar LEPESOVA

Bas múftı dári baǵasyn sharyqtatyp jibergenderge úndeý joldady

Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly el turǵyndaryna vıdeoúndeý joldap, dári baǵasyn qoldan qymbattatpaýǵa shaqyrdy.

«Asyl dinimizde qajet ýaqytta kerek kómekti jasaý úlken saýapty amaldyń birine jatady. Syndarly sátte naýqas jandarǵa qajetti dári-dármekti jetkizip, alǵysyn alaıyq. Dári baǵasyn qoldan qymbattatýǵa jol bermeı, jaqsylyq jasaýǵa asyǵaıyq. Al jurtymyzdy juqpaly indetten arashalap alýǵa bar kúshin jumsap, ján-tánimen qyzmet etip júrgen aq halatty abzal jandarǵa jyly sózimizdi arnap, jigerin oıataıyq. Olar úshin árdaıym duǵada bolaıyq», - dedi QMDB tóraǵasy vıdeoúndeýde.

Bas múftıdiń kóptegen azamat synaq sátinde sadaqa berip, qurban shalyp, duǵa etip jatqandyǵyn atap ótti. Sadaqamyz ben qurbandyǵymyz osy bir náýbetti kezeńnen aman-esen ótýge sebepker bolsyn degen tilegin jetkizdi.

«Biz taǵy da jamaǵatpen duǵa jasap, ıstıǵfar, salaýat aıtýǵa nıet etip otyrmyz. Halyq danalyǵy: «Kóp tilegi kól bolar» deıdi. Barshańyzdy kóppen birge el ıgiligi úshin duǵa jasap, salaýat pen ıstıǵfar aıtýǵa shaqyramyn. Halqymyz: «Aýyr jol – atańdy synaıdy, aýyr is – adamdy synaıdy» degen. Rasynda bul synaq jas pen jasamysqa ońaı tıip jatqan joq. Alla Taǵala dertke shaldyqqandarǵa shıpa berip, dám-tuzy taýsylǵan jandardy meıirimine alǵaı. Ámın!», - dedi Naýryzbaı qajy Taǵanuly.

 

Sońǵy jańalyqtar