6 Shilde, 10:05 493 0 Jańalyqtar Asyl TUMAR

Elbasyn shet memleket basshylary týǵan kúnimen quttyqtady

Elbasy Nursultan Nazarbaevtyń atyna shetel memleketteri men úkimetteri basshylarynan kelip jatqan quttyqtaý hattar legi jalǵasýda. Bul týraly QR Tuńǵysh Prezıdentiniń resmı saıty habarlady.

Qytaı Halyq Respýblıkasynyń Tóraǵasy Sı zınpın óz jedelhatynda Qazaqstannyń Tuńǵysh Prezıdentine myqty densaýlyq pen uzaq ǵumyr tilegen.

«Siz Qazaqstan Respýblıkasynyń negizin qaladyńyz jáne óz halqyńyzdyń ystyq yqylasy men qurmetine bólengen ult kóshbasshysyz. Ózińizben birge Qytaı-Qazaqstan qatynastarynyń ıgiligi jolynda ıyq tiresip jumys istegen kezderdi jıi eske alamyn. Eki el yntymaqtastyǵyn damytýǵa qosqan zor úlesińizdi joǵary baǵalaımyn. Siz árdaıym meniń jaqsy dosym bolyp qala beresiz. Ári qaraı da Qytaı men Qazaqstan arasyndaǵy dostyqty damytýǵa kóńil bólesiz dep senemin. Sizge myqty densaýlyq, uzaq ǵumyr men barlyq bastamalaryńyzǵa tabys, al dostas Qazaqstan halqyna baq-bereke tileımin», – delingen Sı zınpınniń jedelhatynda.

Ázerbaıjan Prezıdenti Ilham Álıev Elbasynyń basshylyǵymen Qazaqstan Respýblıkasy damýdyń úlken jolynan ótkenin atap ótti.

«Sizdiń kóregen jáne tabandy saıasatyńyzdyń arqasynda ekonomıka aıtarlyqtaı ilgeri basyp, halyqtyń áleýmettik ál-aýqaty ósti jáne Qazaqstannyń halyqaralyq arenadaǵy bedeli artty. Qurmetti Nursultan Ábishuly, osynaý aıtýly kúnde Sizdi taǵy da shyn júrekten quttyqtaımyn jáne baýyrlas Qazaqstan halqyna tatýlyq pen baq-bereke tileımin», – delingen jedelhatta.

Armenııa Respýblıkasynyń Prezıdenti Armen Sarkısıan Elbasynyń álemdik deńgeıdegi tulǵalyǵy men danalyǵyna árdaıym tamsanyp keletinin aıtty. «Osy aıtýly kún – Sizdiń Qazaqstannyń qarqyndy damýyndaǵy, halyqaralyq arenadaǵy rólin nyǵaıtýdaǵy zor jetistikterińizdi taǵy bir ret baǵalaýdyń múmkindigi», – delingen A.Sarkısıannyń jedelhatynda.

Sondaı-aq Ýkraına Prezıdenti Vladımır Zelenskıı Elbasyn 80 jyldyq mereıtoıymen quttyqtady.

«Sizdiń memlekettik qyzmetińiz tarıhı kóregendiktiń, halyq múddesine degen adaldyqtyń, táýelsizdiktiń júıeli qorǵalýynyń jáne Qazaqstan Respýblıkasynyń belsendi damýynyń úlgisi. Sizdiń memleketti basqarýdaǵy qajyrly eńbegińiz bizdiń elderimiz arasyndaǵy qarym-qatynastardyń tabysty damýynyń kepiline aınaldy jáne osy yntymaqtastyq budan bylaı da oń qarqynyn saqtaıdy dep senemin. Men Siz sııaqty ýkraın halqynyń Ortalyq Azııadaǵy shynaıy dosy men senimdi seriktesi bar ekenin baǵalaımyn», – dep jazǵan V.Zelenskıı.

Polsha Respýblıkasynyń Prezıdenti Andjeı Dýda Elbasynyń memleketaralyq yntymaqtastyqty damytýdaǵy kúsh-jigerin atap ótti.

«Búgingi tańda Qazaqstansyz halyqaralyq qaýipsizdik arhıtektýrasy týraly aıtý qıyn. Qazaqstannyń BUU Qaýipsizdik Keńesine 2017-2018 jyldardaǵy alǵashqy turaqty emes músheligi kezinde kótergen bastamalary jáne osy alańdaǵy bizdiń birlesken jumysymyz sózime dálel», – delingen Polsha Prezıdentiniń jedelhatynda.

Armenııa Respýblıkasynyń Premer-Mınıstri Nıkol Pashınıan da Nursultan Nazarbaevqa jáne kúlli Qazaqstan halqyna tatýlyq pen baq-bereke tiledi.

«Qazaqstannyń damýyna jáne eýrazııalyq keńistiktegi ózara tıimdi ıntegraııalyq úderisterdi kúsheıtýge baǵyttalǵan Sizdiń kópjyldyq kúsh-jigerińizdiń arqasynda eleýli progreske qol jetkizildi», – dep jazdy N.Pashınıan.

Sondaı-aq Lıtva Respýblıkasynyń Prezıdenti Gıtanas Naýseda, Latvııa Respýblıkasynyń Prezıdenti Egıls Levıts, Iordanııa Koroli II Abdalla ıbn Hýseın ál-Hashımı, Úndistannyń Premer-Mınıstri Narendra Modı jáne Lıýksembýrg Premer-mınıstri Ksave Bettel ózderiniń quttyqtaý hattarynda Elbasynyń Qazaqstannyń táýelsizdigin qalyptastyrýdaǵy jáne halyqaralyq qatynastardy nyǵaıtýdaǵy erekshe rólin atap ótti.

 

Sońǵy jańalyqtar