3 Shilde, 09:51 603 0 Saıasat Anar LEPESOVA

Vladımır Pýtın Nursultan Nazarbaevty mereıtoıymen quttyqtady

Qazaqstannyń Tuńǵysh Prezıdentiniń atyna Elorda kúni men Nursultan Nazarbaevtyń 80 jyldyq mereıtoıyna oraı kóptegen hattar kelip túsýde, dep habarlaıdy Elbasy.kz. 

Reseı Federaııasynyń Prezıdenti Vladımır Pýtın Elbasyna arnaıy beınequttyqtaý joldady.

«Men bizdiń kópjyldyq dostyǵymyzdy qadirleımin jáne maqtan tutamyn. Alǵashqy kezdesýimizden bastap aramyzda ashyqtyǵymen jáne kez kelgen kúrdeli máselelerdi birlesip sheshýge daıyn bolýymyzben erekshelenetin shynaıy joldastyq qarym-qatynas ornady.

Sizdiń danalyǵyńyz ben kóregendigińizdi, zor jaýapkershiligińiz ben salmaqtylyǵyńyzdy, ómirlik jáne basqarý tájirıbeńizdi barsha jurt moıyndady. Siz óz elińizde jáne Reseıde, sondaı-aq búkil álemde kórnekti memleket qaıratkeri jáne naǵyz kóshbasshy retinde joǵary bedelge ıe boldyńyz. Osy jyldardyń ishinde Siz ulttyq kelisimdi, tarıhı, mádenı dástúrlerdi saqtaı otyryp, Qazaqstannyń turaqty damýyna, bolashaqqa nyq senimmen qadam basýyna zor eńbek sińirdińiz», - dedi Vladımır Pýtın.

Ózbekstan Respýblıkasynyń Prezıdenti Shavkat Mırzııoev óz hatynda Memleket basshysy retindegi uzaq merzimdi jáne jemisti qyzmeti barysynda Elbasy tek Qazaqstanda ǵana emes, halyqaralyq arenada da zor qurmet pen bedelge ıe bolǵanyn atap ótti.

«Siz eń kúrdeli tarıhı kezeńde eldi tıimdi basqardyńyz, Qazaqstannyń jańa tarıhy men taǵdyry Sizdiń atyńyzben tyǵyz baılanysty. Zor kúsh-jigerińizdiń, parasatty jáne kóregen basshylyǵyńyzdyń arqasynda Qazaqstan Respýblıkasy óziniń úlken ekonomıkalyq jáne zııatkerlik áleýetin tıimdi paıdalanyp, búginde álemdegi eń qarqyndy damyp kele jatqan elderdiń birine aınaldy», - delingen jedelhatta.

Ispanııa Koroli Felıpe jedelhatynda Nursultan Nazarbaevtyń Qazaqstan Respýblıkasynyń qalyptasýy men damýyna, halyqtyń ál-aýqatyn qamtamasyz etýge qosqan úlesin erekshe atap ótti.

«Osy múmkindikti paıdalana otyryp, Sizge Ispanııaǵa degen erekshe kóńilińiz ben bizdiń elderimizdiń arasyndaǵy berik qatynastarǵa qol jetkizýge qosqan jeke úlesińiz úshin alǵys aıtamyn. Sondaı-aq Sizge zor qurmetimdi bildiremin», - delingen Ispanııa Koroliniń quttyqtaýynda.

Monako knıazi II Alber Elbasyn mereıtoıymen quttyqtap, Nursultan Nazarbaevqa jáne Qazaqstan halqyna myqty densaýlyq pen baq-bereke tiledi.

Moldova Respýblıkasynyń Prezıdenti Igor Dodon Qazaqstannyń Tuńǵysh Prezıdentiniń joǵary saıası bedeli aldaǵy ýaqytta da eldiń turaqty damýyna qyzmet etetinine senim bildirdi.

Chehııa Respýblıkasynyń Prezıdenti Mılosh Zeman óziniń jedelhatynda Nursultan Nazarbaevtyń táýelsiz Qazaqstannyń damýy jolyndaǵy sińirgen eńbegin atap ótti.

«30 jyldyń ishinde Sizdiń basshylyǵyńyzben Qazaqstan kóptegen jetistikke qol jetkizdi. Bizdiń elderimizdiń arasynda uzaq ýaqyttan beri dostyq qarym-qatynastyń jalǵasyp, kóptegen salalardaǵy yntymaqtastyq  eki jaqqa da paıdasyn tıgize otyryp, damyp jatqandyǵyna óte qýanyshtymyn», - delingen Mılosh Zemannyń jedelhatynda.

Aýǵanstan Islam Respýblıkasynyń Prezıdenti Ashraf Ǵanı óz jedelhatynda Elbasynyń ekijaqty qatynastardy damytýǵa jáne memleketaralyq yntymaqtastyqty nyǵaıtýǵa qosqan erekshe úlesin atap ótti.

Izraıl Memleketiniń Premer-Mınıstri Bınıamın Netanıahý Elbasyn mereıtoıymen quttyqtap, eki el arasyndaǵy qatynastardyń odan ári nyǵaıa túsetinine senim bildirdi.

«Sizdiń basshylyǵyńyzben Qazaqstan Respýblıkasy kópsalaly ekonomıkasy bar zamanaýı, jarqyn elge aınaldy. Bul shyn mánisinde Ortalyq Azııa jáne odan tys jerler úshin óte mańyzdy faktor. Men Sizge uzaq ǵumyr, densaýlyq pen baq-bereke tileımin», - delingen jedelhatta.

Sońǵy jańalyqtar