2 Shilde, 20:56 1476 0 Kólik Anar LEPESOVA

Karantın kezinde qandaı poıyzdardyń qozǵalysy toqtaıdy

Qazaqstanda karantınniń kúsheıýine baılanysty jolaýshylardy poıyzben tasymaldaýǵa qatysty shekteý sharalary engizildi.

Bul týraly QR ındýstrııa jáne ınfraqurylymdyq damý mınıstrliginiń baspasóz qyzmeti habarlady.

"Osy jyldyń 2 shildesinde, eldegi aǵymdaǵy epıdemıologııalyq jaǵdaıdy eskerip, memlekettik komıssııa temir jol kóligimen jolaýshylardy tasymaldaý boıynsha shekteý sharalaryn engizý týraly sheshim qabyldady", - delingen mınıstrliktiń habarlamasynda.

Osyǵan baılanysty 5 shildeden bastap №321/322 "Almaty – Saryaǵash" jolaýshylar poıyzy ýaqytsha toqtatylady.

Sonymen qatar, birneshe jolaýshylar poıyzynyń júrý jıiligi qysqarady.

Atap aıtsaq, №3/4 "Almaty-Nur-Sultan", № 31/32" Almaty-Pavlodar" jáne  № 67/68" Nur-Sultan-Óskemen " poıyzdary burynǵydaı kún saıyn emes, kúnara qatynaıdy.

Al №257/258 "Nur-Sultan-Dostyq" poıyzy aptasyna eki ret emes, tek bir ret júredi.

Buǵan deıin 1 shildeden elordadan shyǵatyn úsh poıyzdyń qozǵalysy ýaqytsha toqtatylǵany habarlanǵan bolatyn.

  • №19/20 "Nur-Sultan-Atyraý";
  • №95/96 " Nur-Sultan-Oral";
  • №701/702 "Nur-Sultan-Almaty".

Tótenshe jaǵdaı aıaqtalǵannan keıin, birinshi maýsymnan jolaýshylar poıyzdarynyń qozǵalysy kezeń-kezeńmen jandana bastady. Búginde 93 poıyz qatynaıdy.

 

Sońǵy jańalyqtar