1 Shilde, 14:47 473 0 Saıasat Anar LEPESOVA

Memleket basshysy Ulttyq banktiń esebin tyńdady

Memleket basshysyna Ulttyq bank tóraǵasy Erbolat Dosaev jáne basqarma músheleri ekinshi deńgeıdegi bankter aktıvteriniń sapasyn baǵalaý boıynsha ótken jylǵy qarjy-nesıe saıasatyna qatysty júrgizilgen jumystardyń qorytyndylary, Ulttyq banktiń altyn-valıýta rezerviniń ahýaly jáne Ulttyq qordyń aktıvteri jóninde esep berdi, dep habarlaıdy Aqorda

Qasym-Jomart Toqaevqa Ulttyq banktiń daǵdarysqa qarsy bastamalary, 2020 jyldyń ekinshi jartyjyldyǵyna arnalǵan jospary jáne koronavırýs pandemııasy kezindegi qarjy turaqtylyǵyn qamtamasyz etý úshin qabyldaǵan sharalary týraly baıandaldy.

Qazaqstan Prezıdenti óz sózinde qazirgi jaǵdaıda aqsha-nesıe saıasatyn tıimdi iske asyrýdyń mańyzdylyǵyn atap ótip, 2030 jylǵa deıingi aqsha-nesıe saıasatyn iske asyrý strategııasyn ázirleý barysynda halyqaralyq naryqtaǵy irgeli úrdisterdi eskerý qajettigin aıtty. Jańa Strategııa elimizdegi makroekonomıkalyq turaqtylyqty qamtamasyz etip, qarjy júıesiniń ornyqty damýyna tyń serpin berýi kerek.

Memleket basshysy Ulttyq bankke, Qarjy naryǵyn retteý jáne damytý agenttigine AQR qorytyndysy boıynsha Jol kartasyn júzege asyrýdy jalǵastyrýdy, otandyq bank sektorynyń sapasyna belgilengen merzim boıynsha baǵalaý júrgizýdi tapsyrdy.

Prezıdent aıyrbas baǵamynyń turaqtylyǵyn qamtamasyz etýdi mańyzdy másele retinde atap ótti.

– Bul máselede Úkimet pen Ulttyq bank úılesimdi jumys isteýi qajet ekenin atap aıtqym keledi. Kvazımemlekettik kompanııalardaǵy basy artyq valıýtany ishki naryqqa satý tájirıbesin jalǵastyra berý kerek. Ulttyq bank qajet bolǵan jaǵdaıda aıyrbas baǵamyn turaqtandyrý úshin qosymsha sharalar qabyldaıdy, – dedi Qasym-Jomart Toqaev.

Sonymen qatar Ulttyq bankke Qarjy naryǵyn retteý jáne damytý agenttigimen birlesip, kepilsiz tutyný nesıesine qatysty máseleni udaıy baqylaýda ustaý jóninde tapsyrma berildi.

Memleket basshysy qarjy uıymdarynyń jumysyn ashyq júrgizýdi mańyzdy mindet dep sanaıdy. Bul másele jalǵan lombardtar men mıkroqarjylyq uıymdardyń alaıaqtyq is-áreketteri údeı túsýine baılanysty óte ózekti bolyp otyr.

– Lombardtar men basqa da qarjy uıymdarynyń jumysyna tekserý júrgizip, atalǵan saladaǵy jaǵdaı týraly aqparat berýdi tapsyrdym. Bul jumysty jyldamdatý kerek. Tekserýlerdiń qorytyndysy negizinde Qarjy naryǵyn retteý jáne damytý agenttigine Bas prokýratýramen birlesip, atalǵan salany retteý jumystaryn júıeli túrde júrgizý jáne tutynýshylardyń quqyǵyn qorǵaý jóninde usynys engizýdi tapsyramyn, – dedi Prezıdent.

Pandemııa kezindegi álemdik úrdister men elimizdegi jaǵdaı qarjy salasyna zamanaýı tehnologııalardy engizý qajettigin kórsetti. Osyǵan oraı Qasym-Jomart Toqaev Ulttyq bankke Úkimetpen jáne «Astana» halyqaralyq qarjy ortalyǵymen birlesip, 2025 jylǵa deıingi qarjy tehnologııasy men ınnovaııasyn damytýdyń tujyrymdamasyn bekitýdi tapsyrdy.

Sonymen qatar ekonomıka men bızneske belsendi nesıeleý boıynsha qoldaý kórsetý – Ulttyq banktiń mańyzdy mindeti.

– Sońǵy úsh jylda ekonomıkany nesıeleýdiń ósimi asa baıqalmady. Bankter jumys barysynda barynsha qolaıly jáne tıimdi jaǵdaı usyna otyryp, árbir klıent úshin belsendi kúrespeıdi. Sonymen qatar qazirgi jaǵdaıda bızneske qarjy resýrsy qajet jáne ony jyldam alýy kerek. Sondyqtan Qarjy naryǵyn retteý jáne damytý agenttigi Ulttyq bankpen birlesip, ekonomıkany, shaǵyn jáne orta bıznesti nesıeleýdi arttyrý boıynsha naqty sharalar qabyldaýy qajet, – dedi Prezıdent.

Jıyn sońynda Memleket basshysy Ulttyq banktiń jańa qonysyndaǵy jumysyna tabys tiledi. Prezıdent Ulttyq banktiń kóship kelýi elordadaǵy qarjy sektoryn kúsheıtip, Úkimetpen jáne «Astana» halyqaralyq qarjy ortalyǵymen aradaǵy jumysynyń úılesimdiligin arttyratyna senim bildirdi.

Sońǵy jańalyqtar