1 Shilde, 12:02 396 0 Jańalyqtar Anar LEPESOVA

"Jas otbasy" turǵyn úı baǵdarlamasy iske qosyldy

"Qazaqstannyń turǵyn úı qurylys jınaq banki" AQ 1 shildeden bastap otbasyn jańadan qurǵan januıalarǵa tıimdi sharttarmen páter alýǵa múmkindik beretin "Jas otbasy" jańa turǵyn úı baǵdarlamasyn iske qosty.

Bul týraly banktiń baspasóz qyzmeti habarlady.

Jańa baǵdarlama boıynsha nesıe mólsherlemesi jyldyq 6% teń, ıaǵnı, "Nurly jer" baǵdarlamasy usynatyn mólsherlemeden 1%  ǵana joǵary. Bul tek alǵashqy eki jyldaǵy mólsherleme kólemi, al odan keıin ol 5% deıin tómendeıdi.

Baǵdarlamaǵa qatysý úshin erli-zaıyptylardyń biri nemese ekeýi "Turǵyn úı qurylys jınaq bankinde" "Jas otbasy" depozıtin ashyp, bir jyl ishinde bolashaq páterleriniń 50% jınap baǵalaý kórsetkishiniń "5-shi" deńgeıine jetýi kerek. Depozıtti ashar kezde, olardyń nekege turǵan merzimi 3 jyldan aspaýy tıis (nekege turý týraly kýálikke sáıkes).

Qarajatty jınaqtaý kezinde oǵan jyldyq 2% kóleminde bank syıaqysy men 20% mólsherinde jyl saıynǵy memleket syılyqaqysy (200 AEK-ten aspaıtyn somaǵa eseptelinedi) túsedi. Erli-zaıyptylar depozıtti árqaısysy óz atyna ashyp, keıinnen shottardy "Otbasylyq paketke" biriktirý arqyly eki ese kóp memleket syılyqaqysyn alýlaryna da bolady.

"Jas otbasy" baǵdarlamasynyń taǵy bir artyqshylyǵy – oǵan qatysý barysynda erli-zaıyptylardyń jas mólsheri men otbasyndaǵy balalar sanyna nazar aýdarylmaıdy.

Baǵdarlama sharttaryna sáıkes, jas otbasylar páterdi jańa jáne qoldanystaǵy úılerden ala alady. Nemese jer telimin satyp alyp, úı salýlaryna da bolady. Olarǵa zaem 6 jyldan 9 jylǵa deıingi merzimge beriledi.

"Árbir jas otbasy turǵyn úı jaǵdaıyn jaqsartyp, óziniń jeke baspanasy bolǵanyn qalaıdy. Jyl saıyn Qazaqstanda orta eseppen 152 myńnan astam adam nekege turady. Statıstıkalyq kórsetkishterge súıenetin bolsaq, otbasynyń jeke baspanasynyń bolmaýy kóp jaǵdaıda olardyń ajyrasyp ketýine sebep bolýda. "Jas otbasy" - jaqynda ǵana otbasyn quryp, óz armanyn júzege asyrǵysy keletinder úshin tamasha múmkindik", - dep atap ótti "Turǵyn úı qurylys jınaq bankiniń" basqarma tóraǵasy Lázzat Ibragımova.

Búginde jas otbasylardy baspanamen qamtamasyz etý - Qazaqstandaǵy eń ózekti máselelerdiń biri. 2012 jyldan 2017 jylǵa deıingi 5 jyl ishinde elimizde jas otbasylar úshin baspana kóptep salyndy. Osy oraıda, jasy 29-ǵa deıingi keminde 2 jyl nekede turǵan otbasylarǵa bastapqy jarnasyz, aldaǵy ýaqytta satyp alýǵa bolatyn jaldamaly páterler berildi. 2017 jyly Óskemen qalasyndaǵy jas otbasylar úshin de dál osyndaı múmkindikter usynyldy.

Sonymen qatar, 2019 jylǵy qańtar aıynyń basynda atalǵan baǵdarlama boıynsha Almaty qalasynyń Alataý aýdanyndaǵy "Alǵabas" jáne "Saıaly" yqsham aýdandarynda bólingen 40 páter boıynsha qujattar qabyldandy. Alaıda bul jas otbasylardyń baspana máselesin túbegeıli sheshe almady. "Jas otbasy" baǵdarlamasy respýblıkanyń barlyq aımaqtarynda turaqty túrde júzege asyrylatyn bolady. Onyń sharttary óte tıimdi ári kópshilikke qoljetimdi.

Sońǵy jańalyqtar