21 Maýsym, 11:41 618 0 Qoǵam Araılym Bımendıeva

Dárigerler kúni – barshaǵa ortaq mereke

Dál qazirgideı el basyna kún týǵan shaqta indet oshaǵynda júrip, otbasynan alysta jumys istep jatqan dárigerlerdiń eńbegi erekshe. Naýqastarǵa medıınalyq jáne moraldyq kómek kórsetý jolynda aıanbaı eńbek etken dárigerlerdiń búgingi merekesi de erekshe jaǵdaıda ótip jatyr. Olar indet joıylǵansha aýrýdyń qyzǵan ortasynda eńbek ete bermek. Tipti Covid19 indetin juqtyrǵan dárigerler emdelip shyǵyp, vırýspen kúres jumysyna qaıta jumyldyrylyp jatyr. Beıbit kúnniń batyry atanǵan aq halatty abzal jandardy búgingi merekemen quttyqtaı otyryp, jumystaryna tabys tileımiz.

Qýanysh JIENBAI, halyqaralyq «Alash» syılyǵynyń laýreaty, jazýshy:

Dárigerler jaıly úlken shyǵarma jazatyn kez jetti

– Antyna adal dárigerler pandemııamen kúreste ózderiniń janyn aıamaı, aılap bala-shaǵasynyń júzin kórmeı eńbek etip jatyr. Dárigerdiń eńbegi eren ekenin osy joly shyn sezindik. Buǵan deıin biz «Dárigerler naýqasqa qaramaıdy eken» degen sekildi shyndyqqa asa janaspaıtyn, naqaqty, qulaqqa sińbeıtin, ótkinshi, qysyr áńgimelerdi kóp aıtyp keldik. Al pandemııa kezinde dárigerlerdiń patrıottyq róli bizdiń qoǵam úshin úlgi boldy. Indet bizdiń qoǵamda dárigerlerdiń mańyzyn arttyryp, bedelin kóterdi.

Qazir merzimdi basylymdarda elimizde belgili bir salanyń dáriger mamandary jetispeıtini jazylyp jatyr. Ásirese vırýsologtar, pandemııaǵa qarsy turatyn mamandar kerek. Óz arasynda dárigerlerdiń jetispeýshiligine qaramastan, aq halatty abzal jandar ýaqytpen sanaspaı, kún-tún demeı, adamdardyń ómirin saqtap qalý úshin janyn salyp jumystaryn jasap jatyr. Sondyqtan dárigerlerdiń eńbegi biz úshin ár ýaqytta úlken mártebege ıe.

Meniń joldasym – dáriger. Sondyqtan bolar dárigerlerdiń janyn jaqsy túsinemin. Bıylǵy dárigerler kúni merekesi erekshe jaǵdaıda ótip jatyr.  Bul mereke dárigerler qaýymy úshin ǵana emes, bizdiń elimiz úshin de erekshe meıram ekeni anyq. Sondyqtan biz dárigerge degen qurmetimizdi odan ary asyra bersek, utylmaıtyn dárejedemiz. Dárigerlerge degen bizdiń tarapymyzdan tolyqtaı qurmet pen kómek kórsetip jatqan joq. Biz olardy tek qana qur sózben madaqtaýmen, 1-2 aılyq kóleminde járdemaqy berýmen nemese jalaqysyn az ǵana mólsherde kóbeıtýmen aınalyspaýymyz kerek. Bul baǵytta júıeli ári keshendi jumystar atqarylýy tıis. Medıına qyzmetkerlerine degen bizdiń kózqarasymyzdy túpkilikti ózgertýimiz kerek. Árbir adamnyń aýyrmaı-syrqamaı ómir súrýinde úlken ról atqaratyn dárigerlik qyzmetti biz árqashan da joǵary qoıýymyz qajet. Osy rette qazaq ádebıetinde de dárigerdiń beınesin ashatyn, dárigerdi basty qaharman etip qoıatyn tolyqqandy úlken shyǵarmalar týdyratyn ýaqyttyń ózi kelgen sııaqty. Bolashaqta elimizde dáriger mamandyǵy úlgi tutatyn mamandyqtardyń biri bolatynyna senimdimin.

 

Kúnsulý TURǴYNBEKQYZY, aktrısa, Mádenıet salasynyń úzdigi:

Dárigerlerdiń jaǵdaıy jasalsa, halyqtyń da deni saý bolady

– Álemdi sharpyǵan epıdemııa memleketimizdiń tótennen keletin jaǵdaılarǵa qanshalyqty daıyn ekenin kórsetti. Dáriger mamandyǵynyń altynnan da qymbat, eń qajetti mamandyq ekenin, medıına qyzmetkerlerine kórsetiler qurmettiń budan da joǵary bolýy kerektigine ábden kózimiz jetti. Áýeli Alla, odan keıin aq halatty abzal jandar adam ómiriniń arashashysy. Men dárigerlerge myń qaıtara basymdy ıip taǵzym etkim keledi. Óıtkeni Elbasyn da, prezıdentti de, óner adamdaryn da, ádebıet maıtalmandaryn da, handy da, qarany da, balany da, danany da emdeıtin osy aıaýly aq halatty abzal jandardyń qoly. Búgingideı qıyn jaǵdaıda azamattardyń ómirin saqtap qalý, aýrýdan aman-esen jazylýy dárigerlerdiń biliktiligine tikeleı baılanysty.

Osyndaı syn saǵatta ózderiniń kásibı merekelerin toılaýǵa da múmkinshiligi bolmaı, qabat-qabat kostıýmderdiń arasynda terge malshynyp, bala-shaǵasyn, otbasyn kórmeı qınalyp jatqan barlyq medıına salasynyń qyzmetkerlerine tek jaqsylyq tileımin. Olar da biz sekildi úlken júrekti adamdar. Ókinishke qaraı, qazirgi tańda osy salanyń eńbekaqysy da sonshalyqty tómen, sodan keıin medıına salasynyń qyzmetkerleri jaıynda adamdardyń alyp-qashpa kózqarasy da oń bolmaı tur. Biraq dáriger naýqasty emdep jazý úshin qoldan kelgenshe myń túrli amal jasaıtyn, syn saǵattarda adam balasynyń ómiri úshin kúresetin, qolynan kelgenniń bárin jasaıtyn osyndaı aıaýly jandardy biz kóp synap-minep qoıdyq. Otqa da, sýǵa da túsip júrgen medıına qyzmetkerlerin dattaý, kinálaı salý ońaı bolyp ketti. Osyndaıda jón-josyqsyz dárigerlerdiń eńbegine qııanat keltiretinderdiń máselesin kádimgi sot júıesimen qaraý kerek dep oılaımyn. Dárigerge qurmet zańmen bekitilgende olarǵa degen qurmet te artady. Bul birinshi másele. Ekinshiden olardyń kúni-túni júretin eńbegine alatyn jalaqylary tatymaıdy. Bul másele de kezegimen sheshimin tabýy tıis. Osy indetten aman-esen qutylǵannan keıin, eń áýeli dárigerlerge arnap úlken qurmet kórsetý kerek dep oılaımyn.

Biz indet arqyly neni uǵyndyq? Adam ónersiz ómir súre alady eken, kıim almaı ómir súre alady eken, sán salonyna barmaı ómir súre alady eken. Al biraq adamda densaýlyq bolmasa, basqasynyń báriniń turalap qalatynyn kórdik. Densaýlyq máselesindegi basty járdemshimiz – dárigerler qaýymy. Sondyqtan dárigerlerdiń jaǵdaıy jasalsa, halyqtyń da deni saý bolady. Al deni saý halyqtan densaýlyǵy myqty urpaq dúnıege keledi. Ult bolashaǵy jarqyn bolady, memleketimiz órkendeıdi, damyǵan aldyńǵy qatarly elder qatarynan tabylady.

Ózim dárigerdiń janynda bir kún otyryp kórdim. Damylsyz soǵylatyn telefon, jaǵdaıyn aıtyp shaǵymdanǵan naýqas, dertine shıpa surap aldyna kelgen adam úshin arpalysyp jatqan dárigerlerdi sebepsiz kinálaý ádiletsizdik der edim. Bizdiń elde dárigerlerdiń jan-aıqaıyn, qaýyrt jumysyn ashyp kórsetetindeı jaǵdaı joq. Serıaldarda dárigerdiń ómirin ádemi kórkimen beredi. Al shyn máninde ómir úshin, sanaýly sekýndtar úshin kúresip jatqan jerde áńgime múldem basqa. Sondyqtan shyn eńbekti, asyl eńbekti baǵalaı bileıik dep aıtqym keledi. Ómir beretin anany qalaı ardaqtaǵan bolsaq, ómirdi saqtap qalýǵa tyrysatyn dárigerlerge de sonshalyqty qurmetpen qaraýymyz kerek. Eń bolmasa 24 saǵat jumys isteıtin medıına qyzmetkerleriniń otbasy, ata-anasy, bala-shaǵasynyń tamaqtary toq, uıqylary tynysh bolatyndaı jalaqylary bolsa, esil eńbekteriniń esh ketpegeni dep oılaımyn.

Basqa memleketter óz medıına qyzmetkerlerin joǵary baǵalap jatqan kezde, biz nege sonshalyqty tómen deńgeıge túsip ketkenbiz dep oılaımyn. Sondyqtan syn saǵattarda aıanbaı eńbek etken dárigerlerimizdiń jaǵdaıyn jasaı almasaq, onda bizdiń memlekettigimizge syn bolady.

Osy rette óz basyma jáne kúnine men sekildi myńdaǵan adamǵa kómek qolyn sozǵan Almatydaǵy №7 qalalyq klınıkalyq aýrýhanasynyń qyzmetkerlerine aıtar alǵysym sheksiz. Olar kúni-túni qara demeı, han demeı, 24 saǵat boıy uıyqtamaı halyq úshin qyzmet etedi. Jumys arasynda tipti myzǵyp alatyn da ýaqyttary joq. Merekege oraı, barsha medıına salasynyń qyzmetkerlerine sheksiz rızashylyǵymdy bildirgim keledi. Olar – beıbit kúnniń batyrlary.

 

Sońǵy jańalyqtar