6 Maýsym, 13:17 340 0 Densaýlyq Anar LEPESOVA

COVID-19: Álemde indetten kóz jumý kórsetkishi tómendedi

Álemde koronavırýstyń taralý qarqyny kúsheıdi.

Daily Mail basylymynyń jazýynsha, mamyrdyń alǵashqy aptasynda kún saıyn indet juqtyrýdyń 86 myńǵa jýyq jańa deregi tirkeldi. Alaıda sońǵy aptada bul kórsetkish kúrt kóbeıip, táýligine shamamen 114 myń naýqas anyqtaldy. Indettiń taralý qarqynynyń kúsheıýine Úndistan, Reseı jáne Ońtústik Amerıka elderinde  naýqastar sanynyń artýy sebep.

Dese de, álemde COVID-19 indetinen kóz jumý kórsetkishi tómendaı bastady. Eń joǵary kórsetkish 16 sáýirde tirkelip, 1 mıllıon adamǵa shaqqanda 1,35 ólimdi qurady. Búginde ólim kórsetkishi eki ese tómendep, 1 mıllıon adamǵa shaqqanda 0,67-ge tústi. Mamyrdyń basynda táýligine 5,1 myń naýqas kóz jumsa, sońǵy kúnderi indetten qaıtys bolǵandar sany 4,3 myńǵa deıin azaıdy.

Mılandaǵy San-Raffael aýrýhanasynyń basshysy Alberto Zangrılonyń aıtýynsha, bul kórsetkishter vırýstyń álsireı bastaǵanyn kórsetedi. Dárigerdiń boljamyna súıensek, indetti burynyraq juqtyrǵandarǵa qaraǵanda sońǵy tirkelgen naýqastarda patogender sany birshama az. Alaıda bul teorııa áli dáleldenbegen.

Aıta keteıik, Djons Hopkıns ýnıversıtetiniń sońǵy deregi boıynsha álemde koronavırýs juqtyrǵandar sany 6,7 mıllıonnan asyp jyǵyldy. Qaterli vırýstan 394 984 naýqas kóz jumdy.

Al Qazaqstanda 12511 adamnan koronavırýs anyqtaldy. Indetten 6903 adam emdelip shyqty. Derti asqynǵan 52 naýqas kóz jumdy.

Sońǵy jańalyqtar