4 Maýsym, 12:58 412 0 Zań Anar LEPESOVA

Jańa zań: Prezıdenttiń ókilettigi tolyqtyryldy

Cenattyń jalpy otyrysynda «Qazaqstan Respýblıkasynyń keıbir zańnamalyq aktilerine soǵys jaǵdaıy máseleleri boıynsha ózgerister men tolyqtyrýlar engizý týraly» Zańy qabyldandy. 

Zań jobasynyń negizgi maqsaty – soǵys jaǵdaıy salasyndaǵy zańnamany jetildirý. Bul elimizde qaýipsizdikke tónetin qaterge den qoıý úshin memlekettiń qorǵanys áleýetin qoldaý qajettiginen týyndap otyr.

Zań jobasymen Qazaqstan Respýblıkasynyń Eńbek kodeksine jáne «Jumyldyrý daıyndyǵy men jumyldyrý týraly», «Memlekettik qupııalar týraly», «Soǵys jaǵdaıy týraly», «Qazaqstan Respýblıkasynyń qorǵanysy jáne Qarýly Kúshteri týraly», «Bilim týraly» jáne «Áskerı qyzmet jáne áskerı qyzmetshilerdiń mártebesi týraly» zańdaryna túzetýler engiziledi.

«Onyń maqsaty – memlekettiń soǵys jaǵdaıy kezeńinde jumys isteýi, sonymen qatar beıbit ýaqytta oǵan daıyndalý máselesin quqyqtyq retteý. Ásirese, «Soǵys jaǵdaıy týraly» Zańda Prezıdent ókilettigin tolyqtyrý usynylyp otyr. Ol beıbit ýaqytta iske asyrylady. Bul soǵys jaǵdaıy salasyn qoldaný tártibin aıqyndaý, Qarýly Kúshter Joǵarǵy Bas qolbasshylyǵy Stavkasy týraly, Qorǵanys keńesteri týraly, soǵys jaǵdaıy kezeńinde Úkimet qyzmetin uıymdastyrý týraly erejeni bekitý bolyp otyr», - dedi QR Qorǵanys mınıstriniń birinshi orynbasary Murat Bektanov.

Odan basqa Úkimet qyzmeti mynadaı ókilettikpen tolyqtyrylady: beıbit ýaqytta soǵys jaǵdaıy kezeńindegi mınıstrlikter týraly erejeni bekitý, soǵys jaǵdaıy kezeńinde memlekettik organdy soǵys ýaqytyndaǵy shtatqa kóshirýdi uıymdastyrý, jergilikti atqarýshy organǵa azamattyq jáne aýmaqtyq qorǵanys salasyn qamtamasyz etý mindetin belgileý.

«Sonymen qatar, soǵys jaǵdaıy kezeńinde jergilikti atqarýshy organnyń ókilettigin kózdeý, olarǵa «oblystyń, respýblıkalyq mańyzy bar qalanyń, astananyń qorǵanys keńesin» qurýǵa ókilettik berý usynylady. Bul rette qorǵanys keńesteri áskerı basqarý organy retinde soǵys jaǵdaıy salasynyń oryndalýyn qamtamasyz etedi. Olar tek soǵys jaǵdaıy kezeńine qurylady. Sondyqtan Qarýly Kúshter qurylymyna kirmeıdi», - dep naqtylady vedomstvo ókili.

Munymen qosa, «Qorǵanys jáne Qarýly Kúshter týraly» Zańǵa qorǵanysty josparlaý boıynsha birqatar túzetý engizý usynyldy. Olar júıeli túrde, ıaǵnı barlyq basqarý vertıkaly boıynsha qaraldy. Árbir deńgeıge tıisti ókilettik pen fýnkııa engiziledi. Birinshiden, Prezıdent ókilettigin qorǵanysty josparlaý qaǵıdasyn bekitýmen tolyqtyrý usynylady. Onda jospardyń qujattar jınaǵy, memlekettik organnyń qujatty ázirleý quzyreti kózdelgen.

«Áskerı qyzmet týraly» Zańǵa zapastaǵy serjantty daıarlaý boıynsha birneshe túzetý engiziledi. Áskerı rezervti tolyqtyrý maqsatynda áskerı kafedrada aqyly negizde zapastaǵy serjantty daıarlaý usynylady. «Bilim týraly» Zańǵa joǵary bilim berý uıymyna osy baǵdarlama boıynsha aqyly negizde zapastaǵy serjantty daıarlaý ókilettigin berý arqyly tolyqtyrý usynyldy», - dedi Qorǵanys mınıstriniń birinshi orynbasary.

 

Sońǵy jańalyqtar