4 Maýsym, 12:49 467 0 Týrızm Araılym Bımendıeva

Tarazdyń týrızmi damıdy

Jambyl oblysynyń týrızm salasyndaǵy kadr tapshylyǵy, avtojoldar sapasynyń nasharlyǵy, jol boıyndaǵy servıs deńgeıiniń tómendigi týrızmniń damýyna kedergi keltirip otyr. Bul týraly aımaq basshysy Berdibek Saparbaev atap ótti.

Týrızm basqarmasy osy oraıdaǵy máselelerdi sheshý úshin týrızm salasyn damytýdyń 2020-2022 jyldarǵa arnalǵan strategııalyq josparyn ázirleý ústinde.

Basqarma basshysy Ǵanı Maılybaevtyń aıtýynsha, bul baǵytta birneshe jobany júzege asyrý josparlanǵan. Bes tilde aýdıo jáne beınegıdteri bar Taraz tour mobıldik qosymshasyndaǵy týrıstik nysandar sanyn 200-ge deıin arttyrý kózdelip otyr. Qazirgi tańda qosymshaǵa tek 37 nysan engizilgen. Sondaı-aq jaqynda «Áýlıeata» áýejaıyna Taraz týraly tolyq aqpar beretin smart-dúńgirshekter ornatylmaq.

Basqarma aýdıo jáne vıdeo nusqaýlyǵy bar eki qabatty avtobýsty iske qosýdy josparlap otyr eken. Taraz áıgili 2GIS mobıldi qosymshasyna (sandyq karta) qosylady. Bul týrısterge ózine kerek jerdi taýyp, durys baǵyttaǵy avtobýsqa otyrýǵa kómektesedi. 200 týrıstik nysanda QR-kodtary ornatylady.

Bıyl Aısha bıbi, Qarahan, Babadja-Hatýn keseneleri, Kereı men Jánibek eskertkishteri, Aqyrtas jáne Tekturmas etnotarıhı kesheni sııaqty bes tarıhı-mádenı nysandarda qaıta jańǵyrtý jumystary bastalady. Etnoaýyldar salý boıynsha ınvestorlarmen kelissózder júrgizilmek.

Oblys basshysy Berdibek Saparbaev tıisti memlekettik organdar, týrıstik kompanııalar men qaýymdastyqtar birlesip týrızm ındýstrııasynyń áleýetin arttyrý úshin júıeli negizde jumys júrgizýi qajettigin atap ótti.

– Oblysymyzdyń qolaıly aımaqta ornalasqandyǵyn utymdy paıdalanbaımyz. «Batys Eýropa – Batys Qytaı» avtodálizi bizdiń óńir arqyly ótedi. Ol jolmen kún saıyn myńdaǵan kólik qatynaıdy. Otardan Jýalyǵa deıin Áýlıeatanyń qasıetti oryndary týraly aqparattar jazylǵan bılbordtar ornatý kerek. Koronavırýstyq pandemııa ishki týrızmniń damýyna úlken múmkindikter beredi. Buǵan deıin tanymal bolyp kelgen sheteldik kýrorttar burynǵydaı asa qyzyǵýshylyq týdyrmaıdy. Muny ishki týrızmniń damýyna serpin syılaý úshin tıimdi paıdalana bilgen abzal, – dep qorytyndylady Berdibek Saparbaev.

Sońǵy jańalyqtar