4 Maýsym, 10:19 434 0 Qoǵam Anar LEPESOVA

Aıda Balaeva: Rámizderimiz – asqaq rýh, azattyq, qaharmandyq pen danalyqtyń qasterli nyshany

QR Aqparat jáne qoǵamdyq damý mınıstri Aıda Balaeva el azamattaryn Memlekettik rámizder kúni merekesimen quttyqtady.

«Búgin - Qazaqstan Respýblıkasynyń Memlekettik rámizderi kúni! 1992 jylǵy dál osy kúni táýelsiz Qazaqstannyń jańa memlekettik rámizderi alǵash ret bekitildi. Memlekettik rámizder - memlekettiń myzǵymas negizderiniń biri. Memlekettik rámizder barlyq ýaqytta qoǵamdaǵy ár adam úshin qasterli de, qasıetti boldy. Rámizder halyqtyń bostandyǵy men táýelsizdigin beıneleıdi, onyń qundylyqtary men qasıetti jerlerin, ata-babalar jadyn jáne jańa urpaqtyń bolashaq jetistikterin bildiredi» dep jazdy Aıda Balaeva  Facebook-tegi paraqshasynda.

Mınıstr óz sózinde Qazaqstannyń Týy asqaraly bıik taý shyńdaryna ornatylyp, ǵaryshtan Jer sharyn aınalyp ushqanyn, álemdik deńgeıdegi sporttyq jeńisterde jelbirep, adamdardy azamattyq jáne kásibı erlikterge shabyttandyrǵanyn atap ótti.

«Qaı qaısymyz da Týymyz, Ánuranymyz jáne Eltańbamyzdyń asqaq rýh, azattyq, qaharmandyq pen danalyqtyń qasterli nyshany ekenin jaqsy bilemiz. Biz árkez qasıetti Týymyzdyń astynda Otanymyzdyń táýelsizdigi men halqymyzdyń baqytty da beıbit ómirin qorǵaımyz. Beıbit ýaqytta memlekettilik árbir qazaqstandyqtyń jetistikterin nyǵaıtady - bizdiń árqaısymyz neǵurlym tabysty bolsaq, Táýelsiz Qazaqstan soǵurlym qýatty bolady» deıdi mınıstr.

Aıda Balaeva sóz sońynda elimizdiń barlyq azamattaryn osy qasıetti de mańyzdy kúnmen quttyqtady.

«Barshańyzǵa ósip-órkendeý, ýaqytsha qıyn kezeńdi laıyqty eńserý, ómirlik kúsh-jiger men jasampazdyq tileımin!» dep jazdy Aıda Balaeva.

 

Sońǵy jańalyqtar