3 Maýsym, 13:04 547 0 Jańalyqtar Asyl TUMAR

Latyn álipbıine kóshýde asyǵystyq bolmaýy kerek - Prezıdent

Memleket basshysy Qasym-Jomart Toqaev Reseıdiń «Komsomolskaıa pravda» gazetine bergen suhbatynda kırıllıadan latyn álipbıine kóshý barysy týraly aıtty.

«Bul úderisti bizdiń Tuńǵysh Prezıdentimiz Nursultan Nazarbaev «Rýhanı jańǵyrý» tujyrymdamasy aıasynda kóterdi. Ol latyn qarpine kóshýdiń tek qazaq tiline qatysty ekenin, orys tiliniń jaǵdaıyna áser etpeıtinin birneshe ret málimdedi. Jańa tehnologııalardyń jedel engizilýine baılanysty jahandyq aqparattyq keńistik te qarqyndy túrde ózgerip keledi. Negizgi aqparattar latyn grafıkasyna negizdelgendikten, bizdiń balalarymyz jańa jaǵdaıǵa beıimdelýi kerek», - dedi Prezıdent.
Prezıdent qazaq álipbıin jańǵyrtýdyń qazaq tiliniń kommýnıkaııalyq múmkindikterin keńeıtý nıetinen týyndaǵanyn jetkizdi.

«Sonymen qatar biz Ortalyq Azııa memleketteriniń tájirıbesin eskere otyryp, latyn qarpine birtindep kóshemiz. Qoldan jedeldetýge jol berilmeıdi. Sebebi, munda kırıllıadan latynǵa jaı ǵana kóshý emes, qazaq tiliniń orfografııasyn qaıta qurý jóninde aıtylyp otyr. Odan bólek, qazaq ádebıetiniń klassıkteriniń barlyq mańyzdy eńbekteri kırıllıada jazylǵanyn, kóptegen qazaq urpaqtarynyń kırıll álipbıinde bilim alǵanyn jáne qazir de oqyp jatqanyn esten shyǵarýǵa bolmaıdy. Asyǵys qadam jasaý mundaı úlken iske zııanyn tıgizip, shalys bastyrýy múmkin. Sondyqtan bul máseleni aqylǵa salyp, parasattylyqpen sheshý kerek», - dedi Qasym-Jomart Toqaev.

Sońǵy jańalyqtar