30 Mamyr, 16:48 458 0 Aımaq Anar LEPESOVA

Atyraýda 5 jyl úzilisten keıin ózen portynyń jumysy qaıta jandandy

Atyraýda bes jyl úzilisten keıin ózen porty jumysyn qaıtadan bastady.

Budan bes jyl buryn Atyraý ózen portynyń jumysy toqtaǵan edi. Oǵan basty sebep – Jaıyq-Kaspıı kanalynyń túbin tereńdetý jumysynyń júrgizilmeýi, dep jazady QazAqparat.

«Bul port burynǵy Gýrev qalasynda 1926 jyly ashylǵan. Sodan beri bir ǵasyrǵa jýyq kememen júk tasymaldanyp keldi. Al 2010 jyly portqa rekonstrýkııa júrgizilip, jyl saıynǵy júk qabyldaý qýatyn 15 myń tonnaǵa jetkizgen edik. Alaıda bes jyl buryn jumysymyzdy toqtatýǵa májbúr boldyq. Óıtkeni Jaıyq-Kaspıı kanalymen júk tasymaldaý múmkin bolmady. Kanal joly bitelip, tereńdetý jumystaryn júrgizý qajet boldy», - deıdi Atyraý ózen portynyń dırektory Azamat Zulharnaev.

Onyń aıtýynsha, portqa sý jolymen sońǵy ret 2015 jyly júk kelgen. Sol kezde sheteldik munaı jáne osy saladaǵy servıstik kompanııalarynyń tapsyrysymen jetkizilgen júk qabyldanǵan. Sodan keıin Atyraýǵa sý jolymen keletin júkter Mańǵystaýdaǵy Baýtın portyna jetkizilgen.

Endi mine, Atyraý ózen portyna bes jyldan keıin iri gabarıtti júk jetkizildi. Bul – gaz-hımııa kesheni úshin Ońtústik Koreıada qurastyrylǵan propan saqtaıtyn rezervýarlar.

«Biz gaz-hımııa kesheniniń qurylysyna qajetti rezervýarlardy qabyldap aldyq. Onyń salmaǵy –532 tonna. Iri gabarıtti júkti eki barjamen jetkizdi. Jaqynda taǵy osyndaı úsh barjamen keletin aýyr júkti kútip otyrmyz», – deıdi ózen portynyń qyzmetkeri Rýslan Asanov.

Ózen portynyń dırektory Azamat Zulharnaevtyń aıtýynsha, endi munda alys jáne jaqyn shetelderden taýardyń kez kelgen túri tıelgen sý kólikterin qabyldaýǵa tolyq múmkindik bar.

Sońǵy jańalyqtar