30 Mamyr, 16:15 583 0 Tarıh Anar LEPESOVA

«Tar jol, taıǵaq keshýden» sabyr men tózimniń arqasynda aman óttik – Máýlen Áshimbaev

Ótken ǵasyrdaǵy eń qıly kezeńniń birinde jazyqsyz japa shekkenderdiń rýhyna taǵzym etý – barshamyzdyń perzenttik boryshymyz.   Bul týraly QR Parlamenti Senatynyń Tóraǵasy Máýlen Áshimbaev Facebook-paraqshasynda jazdy.

«Biz 31 mamyrdy Saıası qýǵyn-súrgin jáne asharshylyq qurbandaryn eske alý kúni retinde atap ótemiz. Bul – halqymyz basynan ótkergen qasiretti jyldar jańǵyryǵy. HH ǵasyrdyń basyndaǵy totalıtarlyq júıeniń saldarynan dástúrli turmysymyz kúshpen ózgertildi. El asharshylyqqa tap bolyp, eki mıllıonǵa jýyq adam kóz jumdy. Júzdegen myń qandasymyz týǵan jerin tastap kóshýge májbúr boldy. Saıası qýǵyn-súrgin jyldary da qazaqqa ońaı tıgen joq. Ulttyń kóshin bastaǵan zııaly tulǵalarymyz tar qapastarǵa qamaldy jáne atý jazasyna kesildi. Olardyń jaqyndary da qýdalaýdan qutyla almady. Biz osyndaı «tar jol, taıǵaq keshýden» bereke men birliktiń, sabyr men tózimniń, úmit pen senimniń arqasynda aman ótip, ata-babamyz ańsaǵan azattyqqa qol jetkizdik. Az ýaqyttyń ishinde eldiktiń irgesin nyǵaıtyp, táýelsiz memleket qurdyq. Qazirgideı kúrdeli kezeńderdiń ózin abyroımen eńserip kelemiz», - dep jazdy Senat spıkeri.

Máýlen Áshimbaev Prezıdenttiń saıası qýǵyn-súrgin qurbandaryn aqtaý úshin arnaıy memlekettik komıssııa qurý týraly tapsyrmasynyń tarıhı ádildikti ornatýda mańyzy zor ekenin atap ótti.

«Prezıdentimiz atap kórsetkendeı, ótken ǵasyrdaǵy eń qıly kezeńniń birinde jazyqsyz japa shekkenderdiń rýhyna taǵzym etý – barshamyzdyń perzenttik boryshymyz. Sondyqtan tarıhtan taǵylym alyp, ult úshin bastaryn báıgege tikken arystarymyzdyń esimderin máńgi ulyqtap ótkenimiz jón. Endi eshqashan mundaı zulmat bolmasyn! Táýelsiz Qazaq eli jasaı bersin!», - dep túıindedi palata Tóraǵasy.

Aıta keteıik, búgin Memleket basshysy Qasym-Jomart Toqaev Saıası qýǵyn-súrgin jáne asharshylyq qurbandaryn eske alý kúnine oraı úndeý jarııalady.

Prezıdent óz úndeýinde caıası qýǵyn-súrgin qurbandaryn aqtaý úshin elimizde arnaıy memlekettik komıssııa qurylatynyn málimdedi.

Sońǵy jańalyqtar