27 Mamyr, 12:56 357 0 Zań Anar LEPESOVA

Býkmekerlik keńseler jappaı Býrabaı men Qapshaǵaıǵa kóshiriledi

Májilis «Qazaqstan Respýblıkasynyń keıbir zańnamalyq aktilerine oıyn bıznesi máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda maquldady. 

«Zań jobasy oıyn bıznesi salasyndaǵy zańnamany jetildirýge, býkmekerlik keńseler men totalızatordyń qyzmetin baqylaýdyń tıimdiligin artyrýǵa baǵyttalǵan. Zań jobasyn qaraý barysynda depýtattar jańa oıyn aımaqtaryn ashý týraly normalardy alyp tastaý boıynsha usynys engizdi. Sonymen birge, qujatqa depýtattar býkmekerlik keńseler men totalızatorlardyń kassalaryn Almaty oblysy Qapshaǵaı sý qoımasynyń jaǵalaýyndaǵy jáne Aqmola oblysy Býrabaı aýdanyndaǵy eki oıyn aımaǵy aýmaqtarynda ornalastyrý boıynsha túzetýler engizdi. Osyǵan baılanysty endi býkmekerlik keńseler men totalızatorlardyń kassalary eldi mekenderden atalǵan oıyn aımaqtaryna kóshiriletin bolady», - dedi depýtat Sáken Ótebaev.

Onyń sózine qaraǵanda, depýtattar jaqyn týystarynyń ótinishi boıynsha sottyń qumar oıyndardy jáne bás tigýdi teris paıdalanatyn adamdardy áreket qabileti shekteýli dep taný boıynsha usynys engizdi. Iaǵnı, endi otbasy músheleri men jaqyn týystary óz jaqyndaryn zııandy áreketten shekteý quqyǵyna ıe bola alady.

«Zań jobasyna sot aktisi negizinde Qazaqstan Respýblıkasynyń aýmaǵynda qyzmeti zańsyz dep tanylǵan oıyn bıznesin sheteldik uıymdastyrýshylardyń paıdasyna tólemderdi júzege asyrý boıynsha qyzmetter kórsetýge tyıym salýǵa baǵyttalǵan túzetýler engizildi», - dedi S. Ótebaev.

Eske sala keteıik, bıyl 13 mamyrda Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine oıyn bıznesi máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy .

 

Sońǵy jańalyqtar