26 Mamyr, 21:41 470 0 Jańalyqtar Asyl TUMAR

Karantın jyljymaıtyn múlik naryǵyna qalaı yqpal etti – sarapshy pikiri

Sýret ǵalamtordan alyndy
Sýret ǵalamtordan alyndy

Karantın elimizdegi jyljymaıtyn múlik naryǵyna yqpal etti. Atap aıtqanda, múlikti satý, jalǵa berý naryǵynda toqyraý baıqalǵan. Buǵan Qazaqstan rıeltorlary birikken qaýymdastyǵynyń prezıdenti Larısa Stepanenko taldaý jasady, – dep jazdy QazAqparat.

«Búginde kóptegen stýdentter, jas mamandar, kontraktimen jumys istep júrgen jastar qaladan ketti. Olardyń kópshiligi páterdi jalǵa alyp júrgen. Karantın kezinde kóptegen páterler bosap qaldy», – dedi Larısa Stepanenko.

Sonymen qatar, karantınnen keıin asa qymbat emes hostelder, jataqhanalarǵa suranys artty.

«Sondyqtan, qazir jalǵa berý naryǵynda baǵa túsip jatyr. Al satý naryǵynda baǵa áli túspedi. Oǵan dollardyń óskeni yqpal etip jatyr. Biz jyljymaıtyn múlik salasynyń qyzmetkerleri, rıeltorlar únemi satýshylarǵa aıtamyz. Bul naryqqa dollardyń qatysy qansha? Adamdar jalaqyny teńgemen alady. Buǵan deıin satylmaǵan úıińiz qazir qymbat baǵaǵa satylatynyna senesiz be degen saýaldar qoıamyz. Ekonomıkanyń qarapaıym zańyn da eskerý kerek, tek suranys usynystan asqanda ǵana baǵa kóterilýi tıis. Qazir naryqta kerisinshe, suranys joq. Sondyqtan baǵa negizsiz kóterilip otyr», – dedi L.Stepanenko.

Onyń aıtýynsha, jalǵa alý naryǵynda kóbinese Qazaqstannyń ońtústigi men soltústigindegi iri qalalarda suranys kóp. Sondaı-aq, jekemenshik úılerge qyzyǵýshylyq artqan.

«Iri qalalarda adamdar jekemenshik úıdi jalǵa alyp bolmasa satyp alýǵa ótinim bere bastaǵan. Alaıda, maman karantın aıasynda boljam aıtýǵa bolmaıtynyn aıtty. Bul bizdiń sala úshin tájirıbe boldy. Naryqqa adamı faktordan bólek faktorlar da yqpal ete alatynyn kórsetti. Tutas elderdiń naryǵyna álemdegi ahýal bir saǵatta-aq yqpal ete alatyny anyq boldy. Qazir kóp el jabyq, adamdar demalýǵa qashan shyǵary belgisiz. Tym bolmaǵanda ishki týrızm jandanady degen úmit bar. Al jalǵa alý naryǵynda jaz maýsymynda ilgerileý bolmaıtyny anyq. Jalǵa alýshylar páterdi shekesinen shertip júrip tańdaı alady», – dedi Larısa Stepanenko.

Tótenshe jaǵdaı rejımi aıaqtalǵan soń karantın kezinde ýaqytsha toqtap qalǵan satý-satyp alý týraly mámileler aıaqtaldy. Alaıda, naryqta sonda da belsendilik baıqalmaıdy. Satyp alýshylardan satýshylar óte kóp. «Kóptegen adamdar úshin úı satyp alý keıinge qaldyryldy. Adamdar endi aqshasyn jınaıtyn bolady», – dedi spıker.

Larısa Stepanenko baspana naryǵyndaǵy «5-10-20 baǵdarlamasyn» jaqsy baǵalady.

«Osy baǵdarlamany jasaý týraly tapsyrma jaqynda ǵana shyqty. Qazir ázirge onyń qandaı sharty bar ekenin bilmeımiz», – dedi ol.

Sońǵy jańalyqtar