22 Mamyr, 14:39 708 0 Zań Anar LEPESOVA

Almaty oblysynda 3 kúnde 37 barymtashy ustaldy

Almaty oblysynyń polıeıleri “Mal urlyǵy” jedel aldyn alý is-sharasyn qorytyndylady. Úsh kúnge sozylǵan arnaıy shara barysynda mal urlyǵyna qatysty 15 derek tirkelip, barlyǵynyń izi sýymaı ashyldy, dep habarlaıdy Polisia.kz.

Buǵan deıin oryn alǵan 30 urlyqtyń mán-jaıy áshkerelendi. Oryn alǵan qylmystarda 115 mal qoldy bolǵan. Onyń ishinde, bir jylqy men 114 bas usaq mal bar.

Tártip saqshylary izdestirý barysynda qoldy bolǵan maldy taýyp, 41 bas maldy ıelerine qaıtardy. Onyń ishinde, úsh jylqy, bir iri qara men 37 usaq mal bar. Mal urlyqtaryna qatysy bar degen kúdikpen 37 adam  jáne bes qylmystyq top músheleri ustaldy.

Jedel aldyn alý is-sharasy barysynda mal jáne et ónimderin satýdyń 103 orny tekserildi. 255 sharýa qojalyǵy, qystaqtar men fermalarda maldyń joǵalýynyń aldyn alý boıynsha túsindirý jumystary júrgizildi.

Mal tasymalymen aınalysatyn 120 avtokóliktiń qujattary tekserilip, Eńbekshiqazaq jáne Balqash aýdandarynda tıisti qujattarsyz mal tasymaldaýdyń eki deregi anyqtaldy.

Esterińizge sala keteıik, 18-20 mamyr aralyǵynda Almaty oblysy aýmaǵynda “Mal urlyǵy” jedel aldyn alý is-sharasy ótkizildi. Arnaıy sharanyń basty maqsaty mal urlyǵynyń aldyn alý jáne buryn oryn alǵan qylmystardy ashý, mal urlyǵyna qatysy bar adamdardy anyqtaý.

Sońǵy jańalyqtar