«Таза сессия» жасырын сауалнамасының нәтижесі жарияланды
«Таза сессия» жасырын сауалнамасының нәтижесі жарияланды
Jas Otan бұқаралық ақпарат құралдары үшін брифинг өткізді. Онда студенттердің жатақханаларда тұру жағдайына жүргізген мониторингтің қорытындысы, студенттер арасында жеке ЖОО-да сыбайлас жемқорлыққа қатысты «Таза сессия» атты жасырын сауалнаманың екінші кезеңінің нәтижелері жарияланды.
Jas Otan жастар қанатының дерегі бойынша, барлық облыстарда, сондай-ақ Нұр-Сұлтан, Алматы және Шымкент қалаларында 645 студенттік жатақхана жұмыс істейді. Оның 270-і жоғары оқу орындарындағы, 375-і колледж жанындағы жатақханалар. Жалпы, 2019-2020 оқу жылында 259 мың студент, яғни Қазақстанның әрбір төртінші студенті жатақханадан орын сұраған. 169 мың студенттің өтініші қанағаттандырылды. Бұл жалпы өтініштердің 67 пайызы болып отыр.
Елбасы Нұрсұлтан Назарбаевтың бес әлеуметтік бастамасын жүзеге асыру мақсатында 2022 жылдың соңына дейін Қазақстан бойынша 75 мың орындық студенттік жатақхана нысандарын салу жоспарланып отыр. Сонымен қатар Nur Otan партиясының Төрағасы негізгі мәселелерді анықтау үшін студенттердің жатақханаларда тұру жағдайын тексеру міндетін қойды. Осыған байланысты Jas Otan Жастар қанатының 2000-нан астам белсендісі 270 жатақханаға рейд жүргізді. Қазіргі кезде 375 жатақханада студенттердің тұру жағдайын тексеру жұмыстары жалғасуда.