Аймағамбетов мектеп ауласындағы дәретханалардың барлығын жабуды ұсынды

Аймағамбетов мектеп ауласындағы дәретханалардың барлығын жабуды ұсынды

ҚР Білім және ғылым министрі Асхат Аймағамбетов Қазақстан мектептеріндегі даладағы дәретханаларды жабуды ұсынды. Ведомство басшысының Балалар құқығын қорғау жөніндегі ведомствоаралық комиссия отырысында келтірген дерегіне сүйенсек, елімізде дәретханасы далада орнатылған 2 352 мектеп бар. Мұндай мектептердің 60 пайызы Түркістан облысында, 54,6 пайызы Алматы облысында, 44 пайызы Батыс Қазақстан облысында және 43 пайызы Қызылорда мен Шығыс Қазақстан облыстарында орналасқан. Осыған орай министр білім беру нысандарына біліктілік талаптарын қайта қарауды ұсынды. «Қайғылы жайттың қашан орын алатындығын күтудің қажеті жоқ (...). Бізге білім беру нысандарына қойылатын біліктілік талаптарын қайта қарап, санитарлық ережелер мен нормаларда даладағы дәретханалар мүлдем болмауы тиістігі жазылу үшін Денсаулық сақтау министрлігіне жүгіну қажет шығар. Мұндай жағдайда жергілікті атқарушы органдар мектеп лицензиясы болуы үшін, мектеп жұмысын одан ары жалғастыруы үшін шынымен де шынайы шаралар қабылдауға мәжбүр болады»,- деді А.Аймағамбетов. Осы ретте ол бұл мәселеге қатысты нақты жол картасы болуы тиістігін айтты. «Бір күннің ішінде ешкім де жылы дәретхана сала алмайды. Шалғайда орналасқан елді мекендер бар. Дегенмен, проблеманы шешу қажет», - деді ол.