Жүргізуші куәлігінсіз рөлге отырғандарға салынатын айыппұл 5 есе артады

Жүргізуші куәлігінсіз рөлге отырғандарға салынатын айыппұл 5 есе артады

Мәжіліс жаңа Әкімшілік құқық бұзушылықтар кодексін талқыға салды.  Депутаттар жүргізуші куәлігі жоқ тұлғаның көлік құралын басқарғаны үшін айыппұлды 5 есеге арттыруды көздеп отыр. Бұл туралы бүгін Мәжілістің отырысында заңнама және сот-құқықтық реформа комитетінің мүшесі, депутат Қанат Мусин мәлімдеді, деп хабарлайды Zakon.kz. Қазіргі уақытта мұндай құқық бұзушылық үшін жаза 10 АЕК (25 250 теңге) көлемінде айыппұл төлеуді қарастырады. Енді Әкімшілік құқық бұзушылық туралы кодекске өзгертулер енгізу бастамасын көтергендер бұл соманы 50 АЕК-ке (126 250 теңге) дейін көбейтуді ұсынуда. Мусиннің пікірінше, Әкімшілік құқық бұзушылық туралы кодекске енгізілген түзетулер әкімшілік заңнаманы жетілдіруге, әкімшілік жауапкершілікті ізгілендіруге, мемлекеттік органдар мен сот билігі арасындағы өкілеттіктердің аражігін ажыратуға бағытталған. Атап айтқанда, депутаттар жекелеген құқық бұзушылықтарды жойып, кодекстен алып тастады. Бұл азаматтарды жауапкершілікке тартпай-ақ, сотта азаматтық іс бойынша шешуге болатын дауларға қатысты жасалады. Бірқатар құқық бұзушылық үшін айыппұлдар мөлшері азайтылды. Сондай-ақ қолданыстағы әкімшілік жазалар жеңілдетілді. – Сонымен бірге депутаттардың ұсынысы бойынша жол қозғалысы саласындағы белгілі бір бұзушылықтар үшін айыппұлдар көбейтілді. Мәселен, көлік құралын жүргізу құқығынан айырылған адам рөлге отырса, 50 АЕК айыппұл салынады. Қазір бұл айыппұл мөлшері – 10 АЕК. Мұндай бұзушылықты қайталағаны үшін айыппұл мөлшері 20-дан 70 АЕК-ке дейін ұлғайтылды. Бұл түзету қазақстандықтардың жолдағы қауіпсіздігін қамтамасыз ету үшін қабылданды, – деді Мусин.