شەتەلدەگى قازاقتار اتاجۇرتىن تاۋەلسىزدىك كۇنىمەن قۇتتىقتادى

شەت ەلدەردەگى قانداستاردىڭ تاۋەلسىزدىككە ارناعان تىلەگى!

ۇلت ءۇشىن ۇلىق مەرەكەلەردىڭ ءبىرى – 16 جەلتوقسانداعى تاۋەلسىزدىك كۇنى ەلىمىزدە عانا ەمەس، سونداي-اق، بۇكىل جەر شارىندا اتالىپ وتىلەدى. بۇل كۇنى شەكارا سىرتىنداعى قانى قازاق بارلىق باۋىر اتاجۇرتقا دەگەن ىستىق لەبىزى مەن جۇرەكجاردى تىلەگىن اياماي توگەدى. قازاق ەلىنە دەگەن قۇتتىقتاۋلارىن بىرنەشە قانداس «تۇركىستان» گازەتى ارقىلى جەتكىزگەن ەدى.

Kesici

ابدۋلقايىم كەسىجى، ەۋروپا قازاقتارى قوعامدارى فەدەراتسياسىنىڭ توراعاسى، ميۋنحەن، گەرمانيا:

– ۇلتىمىزدىڭ ۇلىق مەرەكەسى – قازاقستان تاۋەلسىزدىگىنىڭ 24 جىلدىعى قۇتتى بولسىن! اتا-بابالاردىڭ سان عاسىرلار بويى اڭساعان ارمانى، اسقاق مۇراتى – قازاقستاننىڭ ەگەمەندىگى باياندى بولىپ، ۇلتىمىزدىڭ مارتەبەسى ارتا بەرسىن!

مەملكەتتىك ومىردە «قاس-قاعىمداي-اق» قىسقا مەرزىم سانالاتىن 24 جىلدىڭ ىشىندە قازاقستاننىڭ اتاق-داڭقى الەمگە ارتىپ، حالىقارالىق دەڭگەيدە ابىرويى اسقان ەلدەردىڭ بىرىنە اينالدى. ءتىپتى، ول ەۋروپاداعى قاۋىپسىزدىك جانە ىنتىماقتاستىق ۇيىمى مەن يسلام كونفەرەنتسياسى سياقتى الەمدىك دەڭگەيدەگى ۇيىمدارعا باسشىلىق ەتتى. بۇعان قوسا، قازاقستان تاۋەلسىز مەمەلكەت رەتىندە ەكونوميكالىق-ساياسي دامۋ جولىنا ءتۇسىپ، ۇلكەن بەلەستەردى باعىندىردى. الەمنىڭ دامىعان 30 ەلىنىڭ قاتارىنان ورىن الۋدى ماقسات ەتتى. مۇنىڭ ءبارى ەلباسى نۇرسۇلتان نازارباەۆتىڭ كورەگەن ساياساتىنىڭ ارقاسىندا دەپ بىلەمىز. پرەزيدەنت نازارباەۆتىڭ جەتەكشىلىگىمەن قازاقستان قارقىندى تۇردە دامي بەرەتىندىگىنە جانە العا قويعان ماقساتتارىنا جەتە بەرەتىنىنە سەنىمىمىز مول.

شەتتەگى قازاقتىڭ ەلدەگى قازاققا ايتاتىن تىلەگى: قازاقتىڭ باسىنداعى باق – تاۋەلسىزدىكتى ساقتاپ قالۋ. جەر بەتىندەگى بۇكىل قازاقتىڭ اماندىعى.

قازاقستان ىرگەلى ەل بولىپ، حالىقارالىق دەڭگەيدە اسا جوعارى ساتىعا كوتەرىلگەن اتاق-ابىرويى اسقاقتاي ءتۇسىپ، تاۋەلسىزدىگىمىزدىڭ سيمۆولى – كوك بايراعىمىز كوكتە ماڭگى جەلبىرەي بەرسىن!

جاساسىن تاۋەلسىز قازاقستان!

ابدۋلسامەت التايابدۋلسامەت التاي، پاريج، فرانتسيا:

– مەن ۇزاق جىلدار بويى گەرمانيادان حابار تاراتقان «ازاتتىق» راديوسىن تىڭدادىم. 1991 جىلدىڭ قازانىندا راديونى اۋەلبەك دەگەن دوسىم ەكەۋمىز تىڭداپ وتىرعان ەدىك. جۇرگىزۋشى: «الماتىداعى مەملەكەتتىك الاڭنان تىكەلەي بايلانىستامىز. ميكروفوندا – باتىرحان دارىمبەت ۇلى»، – دەدى. ال باتىرحان دارىمبەت ۇلى قازاقستان پرەزيدەنتى قازاقستاننىڭ تاۋەلسىزدىگىن جاريالاعانىن ايتتى. بۇل ءسۇيىنشى حاباردى ەستىگەندە قالاي قۋانعانىمىزدى سوزبەن ايتىپ جەتكىزۋ قيىن. ىلە-شالا ميۋنحەندەگى «ازاتتىق» راديوسىنا حابارلاسىپ، تاۋەلسىزدىگىمىزبەن قۇتتىقتادىق. كەيىن بىلدىك، ەۋروپانىڭ بىرنەشە قالاسى، تۇركيا مەن امەريكادان بارلىعى راديو ارقىلى قازاقستاننىڭ ەگەمەن ەل رەتىندە تانىلعانىنا قۋانىپ، قۇتتى بولسىن ايتىپتى. اللاعا شۇكىر، بيىل قازاقستان ەگەمەندىگىنىڭ 24-جىلدىعىن اتاپ وتۋدە. الەمگە تانىلعان مەملەكەتكە اينالدى. بۇيىرتسا، جاقىن ارادا دامىعان ەلدەر تىزىمىنەن كورىنەدى. العاشقى پرەزيدەنتىمىز نۇرسۇلتان ءابىش ۇلى نازارباەۆتىڭ سارابدال ساياساتىنىڭ ارقاسىندا بۇگىنگى جەتىستىكتەرگە قول جەتكىزدىك. ەلىمىز امان، جۇرتىمىز تىنىش، ەلباسىمىزدىڭ دەنساۋلىعى مىقتى بولسىن! قازاقستاننىڭ تاۋەلسىزدىك كۇنى قۇتتى بولسىن! قازاق ەلى ماڭگى جاساسىن، كوك بايراعىمىز كوكتە جەلبىرەسىن!

ديلەك تاشدەمير-كالكان، امستەردام، گوللانديا:

– اتاجۇرتىم – قازاقستانىمدى 24-رەت تويلاعالى وتىرعان تاۋەلسىزدىك كۇنىمەن شىن جان-جۇرەگىممەن قۇتتىقتايمىن! الداعى ەگەمەندىك تويلارىنىڭ بارىمىزگە جەمىستى دە جەتىستىكتى بولۋىن تىلەيمىن! پرەزيدەنتىمىز قۇرمەتتى نۇرسۇلتان نازارباەۆ ايتپاقشى، بۇل مەملەكەت كۇنى كەشە قۇرىلعان جوق. عۇندار زامانىنان بەرى قازاققا تيەسىلى توپىراق. اللا تاعالا ءبىزدى وتانسىز، بايراقسىز، يەسىز، كيەسىز قالدىرماسىن. مەن كىندىك قانى تۇركيادا تامىپ، بالالىق شاعى امستەردامدا وتكەن قازاق قىزىمىن. قازىر ۇرپاق تاربيەسىنە كوڭىل بولەتىن ءبىر انا رەتىندە ءۇشىنشى وتانىم – گوللانديادا ءوزىم ەشقاشان كورمەگەن اتاجۇرتىم – قازاقستانىمنىڭ تىلەۋىن تىلەپ، ىشتەي قاتتى اڭسايمىن، ساعىنمانى، جاقسى كورەم ءارى قازاق بولعانىمدى ماقتان تۇتامىن. كىشكەنتاي كەزىمدە ۇستازدارىمنان ۇيرەنگەن بىرنەشە قازاق ءانىن جانە «قاراجورعا» ءبيىن ءوزىمنىڭ ەكى قىزىما دا ۇيرەتتىم. كۇيەۋىم ەكەۋمىز 10 جانە 5 جاستاعى ەكى قىزىمىزعا قولىمىزدان كەلگەنشە قازاقى تاربيە بەرۋگە، ۇلتتىق قۇندىلىقتارىمىزدى بويلارىنا سىڭىرۋگە تىرىسىپ كەلەمىز. اينالامىزداعى گوللانديالىق، شەتەلدىك دوستارىمىزعا قازاقتىڭ قانداي ۇلت ەكەنىن ۇلىقتاۋدى پەرزەنتتىك پارىزىمىز دەپ بىلەمىز. بالالارىمىز وزدەرىنىڭ قانى قازاق ەكەنىن ماقتان تۇتادى. البەتتە، بۇل جەتكىلىكسىز. ءبىز شەتتە جۇرسەك تە، انا تىلىمىزدە جاتىق ءارى ەركىن سويلەۋدى، فولكلورلىق مقرالارىمىزدى كاسىبي دەڭگەيدە جەتىك مەڭگەرۋدى ارماندايمىز. وسىلايشا، كەلەشەك ۇرپاقتارىمىزعا ۇلتتىق قۇندىلىقتارىمىزدى مۇرا رەتىندە قالدىرار ەدىك.

وسى ورايدا، الەمگە ەگەمەن ەل رەتىندە تانىلعالى 24 جىل وتكەن قازاقستانىمدى تاۋەلسىزدىك كۇنىمەن قۇتتىقتايمىن! اتاجۇرتىمىز ءوسىپ-وركەندەي بەرسىن. ابىروي-اتاعى شارىقتاسىن، كوك تۋىمىز كوك اسپاندا قالىقتاسىن! ۇلىق مەرەكەڭ قۇتتى بولسىن، قازاعىم!

                                               ءنازيا جويامەرگەنقىزى

 

ۇقساس جاڭالىقتار

Back to top button