Доллар бағамы таяу уақытта 400, тіпті 500 теңгеге дейін көтерілуі ықтимал. Бұл – экономика ғылымдарының кандидаты, А.Байтұрсынов атындағы ҚМУ ғылым басқармасының басшысы Андрей Ковальды болжамы. Маман қостанайлық "Наша Газета" газетіне берген сұхбатында ұлттық валютаның болашағы туралы ойларымен бөліскен.
"Мен теңгенің құлдырауын мұнай бағасының түсуімен байланыстырып жатқан сарапшылардың қатарынан емеспін. - деп мәлімдеді сарапшы. - Әрине, мұнай бағасы ұлттық валютаға айтарлықтай әсерін тигізеді, бірақ мен, бірінші кезекте, теңгенің құлдырауын өндіріс секторымен байланыстырамын. Шағын және орта бизнес қысым көріп отыр. Оларды дамыту үшін дамудың нақты бағдарламалары қажет, бірақ олар бізде қазіргі уақытта рәсімдеу сатысында. Кредит-қаржы механизмдері де жұмыс істемейді. Ұлттық банк болса, өкінішке қарай, жағдайға постфактум әсер етуді біледі, ал механизмдері жоқ", – дейді Коваль.
Маманның пікірінше, халық валюта нарығындағы жағдайға үреймен қарап отыр, бұл қатердің бар екенін көрсетеді. "Барлық осы факторлар таяу уақытта теңгенің экономикалық даму деңгейімізге сәйкес орынға дейін баратынына әкеп соқтырады. Сорып-қазып сатудан емес, нақты өндіретін тауарымызға байланысты табыс аламыз. 2016 жылдың наурызында доллардың құны 350 теңгеге дейін жетеді деп айтқанмын, бірақ болжамым ерте орындалып қойды. Келесі психологиялық цифр - доллар үшін 400 немесе 500 теңге болады, ал еуроның құны маңызды болмай қалады. Адамдар да, бизнес те осы жағдайларда өмір сүріп үйренуі керек. Ұлттық валютаның нығаюына сеп болатындай факторлар жоқ, мұнайдың да қымбаттауына себеп жоқ. Меніңше, Brent маркасының құны барреліне 15-10 долларға дейін түсіп кетеді, ал кейін көмірсутектер энергетикада басым ролінен айырылуы да мүмкін", - деп болжам жасады.