18 Қыркүйек, 17:03 528 0 Өнер Анар ЛЕПЕСОВА

Қарағандыда халықаралық ақындар айтысы басталды

Қарағанды қаласында «Рухани жаңғыру» бағдарламасы аясында әйгілі ақын, жазушы, мемлекет және қоғам қайраткері Сәкен Сейфуллиннің 125 жылдығына арналған халықаралық айтыстың шымылдығы түрілді. Ақынның атын иемденген облыстық қазақ драма театрында айтулы доданың салтанатты ашылу рәсімі өтті. 

Қарағанды жұртшылығы Елорда мен еліміздің басқа қалаларынан, сондай-ақ Монғолиядан, Қырғызстаннан, Қытайдан келген айтыскерлерді үлкен құрметпен қарсы алды. Халық әншілері қызыл кілем бойымен театр ғимаратына өтті.

– Айтыс – ол сенім. Себебі кейде халық басқаларға сенбеуі мүмкін. Бірақ айтыскерлерге сенеді. Менің ойымша, айтыскерлер үшін ең жоғарғы мандат, ең жоғары құрмет – осы халықтың ниеті мен сенімі. Себебі халық ақындардан тек қана шындықты күтеді. Ақын мінезі мен арын ешуақытта сатпайды. Себебі ол ақынның жеке ары мен мінезі емес, ол – көп жағдайда халықтың ары, жұрттың көңіл- күйі. Сәкен Сейфуллинің тілімен айтқанда: «Айтыс – заманның ақиқаты». Екіншіден, айтыс – ол жүрек. Ашығын айту керек, кейде адамды көз алдайды, құлақ алдайды, тіпті тіл де алдауы мүмкін. Бірдеңеге алып келіп, соқтыруы мүмкін. Бірақ – жүрек алдамайды. Ал ақын – мәселені жүрекпен көреді, жүрекпен жеткізеді. Сондықтан жүректен шыққан жырларды халық жүрекпен қабылдайды, – деді Қарағанды облысының әкімі Ерлан Қошанов.

Халықаралық айтыс және жыршы-термешілер одағының басшысы Ерман Жүрсіннің айтуынша, Қарағанды халқы осы өнер түрін ең ыстық әрі құмарлықпен қабылдайтын көрермендер.

– Мен Сәкен ағаның туған жерінде оның мерейтойын осындай ауқымда атап өтетініне қуаныштымын. Ұлы тұлғаның құрметіне бірнеше салтанатты шаралар өтті. Ақындар айтысы сол мерейтойлық жиындарды жалғастырды және мықты ақындардың басын қосты. Бұл біздің Елбасы – Қазақстан Республикасының Тұңғыш Президенті ұсынған «Рухани жаңғыру» ұлы идеясының нақты іске асырылуы, - деп атап өтті Жүрсін Ерман.

«Айтыс – қазақтың ежелгі өнері және өте күрделі, себебі ақындар толығымен суырып салма өнерінің көмегімен жеңіске жете алады. Біздің халық ақындарды өте жақсы көреді. Әр айтыста әрқашан залда ине шаншар жер болмайды. Себебі әрдайым мықты ақындар жиналады», - дейді қазылар алқасының төрағасы, танымал актер және режиссер, Халық әртісі, Қазақстанның Еңбек Ері Асанәлі Әшімов.

Айтыстың бүкіл елге  Qazaqstan телеарнасының эфирінде көрсетілетіні өнерсүйер қауым үшін үлкен олжа болды. Бұл телерадиокорпорация, Nur Otan партиясы және біздің қоғамдық бірлестік жасаған меморандумның арқасында мүмкін болды. Мұндай жобалар руханиятты жандандыруға, ұлттың мәдени кодтың сақталуына ықпал етеді дейді ұйымдастырушылар.

–Сәкен Сейфуллин құрметіне өткізілетін осы айтыс қазақ халқы үшін өте маңызды. Қазақстанда айтыстар менің отаныма қарағанда жиі өткізіледі. Осылайша мәдени мұраны бағалайтындарыңыз, салт-дәстүрлерді құрметтейтіндеріңіз және халық өнерін қолдайтындарыңыз өте жақсы, – деді Бішкектен келген айтыскер Жеңісбек Тоқтөбеков. Екі күн бойы театр сахнасында 18 айтыскер бас жүлде үшін бақ таластыратын болады. Шараның жабылу салтанаты өтетін 19 қыркүйекте жеңімпаздарға жүлде тапсырылады.

Гран-при иегері 3 млн. теңге көлемінде ақшалай сыйлық алады. Бірінші орын үшін – 1,5 млн. теңге, екінші орынға – 750 мың теңге, үшінші орын үшін – 500 мың теңге сыйақы белгіленіп отыр. Сонымен қатар екі арнайы жүлде қарастырылған.

Соңғы жаңалықтар