Алыптарды ардақтау

Алыптарды ардақтау

Газетіміздің 29 тамыз күнгі №34 санында «Не істеуіміз керек?!» деген тақырыпта мақала жарияланған болатын.  Мақала авторы «Ұлы Абайдың ізімен» экспедициясына қатысып, Абай Құнан­бай­ұлы­ның өмір тарихына қатысты өлкені аралаған. Сол сапары барысында Ұлы ақынның мәңгілік тыным тапқан мекеніне жетудегі жолдың қиындығы мен атқарылуға тиісті бірнеше мәсе­лені атап өтеді. Осы олқы­лық­тар Абайдың 175 жылдығы аясында қолға алынса деп ұсыныс айтылады. Енді міне жуықта ғана Елордада Абай Құнанбайұлының 175 жылдық мерейтойын атап өтуге байланысты Мемлекеттік комис­сия­ның алғашқы отырысы өтіп, аталмыш мақалада ұсынылған бірнеше мәселенің оңынан шеші­луі­не ықпал ететін шешім шық­қан­дығын қуана хабарлаймыз.  Ақордада Қазақстан Республи­ка­сы­ның Мемлекеттік хатшысы Марат Тә­жин­нің төр­аға­лы­ғымен Абай Құнан­бай­ұлы­ның 175 жыл­дық ме­рей­тойын дай­ын­­дау және өткізу жө­нін­дегі Мемлекеттік комис­­сияның отырысы өтті. Отырысты ашқан Мемлекеттік хатшы Марат Тәжин «Рухани жаңғыру» бағ­дар­ла­масының маңызды бағыты ұлт­тың «мәдени кодын» сақтау болып табылады, бұл орайда, мерейтойлық іс-шаралар Абайдың рухани мұрасын сақтауға, зерделеуге және наси­хат­тауға бағытталуы тиіс, – деп атап өтті. Отырыста сөз сөйлеген Мәдениет және спорт министрі Ақтоты Райымқұлова, Білім және ғылым министрі Асхат Ай­ма­ғамбетов, Ақ­парат және қоғамдық даму министрі Дәу­рен Аймағамбетов, Гумилев атындағы ЕҰУ ректоры Ерлан Сыдықов, Шы­ғыс Қазақстан облысының әкімі Даниял Ахметов, Ұлттық аударма бюросының ат­қа­рушы директоры Рауан Кенжеханұлы  жос­парланған іс-шаралар мен жобалар туралы баяндады. Абай шығармалары шетелдердің іргелі тілдеріне  (ағылшын, араб, испан, қытай, орыс, француз, неміс, түрік, жапон және италиян) аударылып, шығарылады. «Ұлттық аударма бюросы» қоғамдық қорының атқарушы директоры Рауан Кенжеханұлы бұл жобаға әртүрлі ел­дерден үздік кәсіби аудармашылар және Қазақ­станның жетекші абайтанушылары қаты­сат­ынын айтты. Абай еңбектерінің халық­аралық таныстырылымын Қазақстанның елшіліктерінде, шет елдердегі оқу орындарда, зерттеу және мәдени орта­лық­тарда өткізу жоспарлануда. Халықаралық Түркі академиясы да Абай ең­бек­терін түркі халықтарының тілдеріне аударып, шығаруды жоспарлап отыр.