Гонконгта наразылық акциясы жалғасуда

Гонконгта наразылық акциясы жалғасуда

Гонконгте соңғы екі күн қатарынан жергілікті билік келісім берген шерулермен бірге рұқсат етілмеген наразылық акциялары да өтті. Оған қатысушылар қала әкімшілігін жауапқа тартуды және демонстранттарға полицияның күш қолдануын доғаруды талап етті. Қаладағы халықаралық әуежайда "Гонконгке бостандық" ұранымен үш күндік наразылық жалғасып жатыр. Жексенбі күні полиция қаланың екі ауданында көшеге шыққан наразыларды тарату үшін көзден жас ағызатын газ шашты. Гонконгтің мыңдаған тұрғыны Пекин ұсынған "қылмысқа күдіктілерді Қытай, Макао және Тайпейге беру туралы" заң жобасына қарсылық шерулерін өткізіп жатқанына оныншы апта болды. Биліктің пайымдауынша, бұл заң жобасы "Гонконгке қашып, бас сауғалайтын қылмыскерлердің" санын азайтады. Алайда наразылар "бұл заң қабылданса, Пекинді сынаушылар, Қытайдағы қысымнан қашып, Гонконгке келгендер, тіпті туристер зардап шегеді" деп санайды. Пекин Гонконгтегі наразыларды "Қытайды ұнатпайтын" Батыс пен АҚШ-қолдап отыр деп айыптады. Ұлыбритания Гонконгті 1997 жылы Қытайға қайтарып берген. Гонконг – Қытайдың ерекше әкімшілік аймағы болып саналады, бірақ онда "бір ел – екі жүйе" принципі қолданыста. Гонконгтің өз заңы бар, азаматтардың құқығы Қытаймен салыстырғанда жақсы қорғалады. Гонконг "қылмыскерлерді, я күдіктілерді экстрадициялау туралы" 20 елмен келісім жасасқан. Олардың арасында АҚШ, Ұлыбритания бар. Ал Қытай мен Гонконг бұл келісімді 20 жылдан бері талқылап келеді.