3 Тамыз, 11:04 363 0 Әлеумет "Түркістан" газетінің авторлары

«Құрметті азамат» атағын беруді доғарсақ қайтеді?

Кәрібай Мұсырман, Мәжіліс депутаты:

– «Құрметті азамат» атағының құны түсіп кетті. «Жер сатушы» атанған әкім де, парақорлығының исі мүңкіп тұрғаны үшін қызметінен түсірілген судья да, тіпті өңір басшысына «оңды» бата берген дарынсыз журналист те, облыс әкіміне кандидаттық диссертация жазып берген ғалым да «Құрметті азамат» атанғанын жұрт күлкі етіп айтып жүр. «Бір қызымнан бір қызым сорақы» дегендей, жуырда бұрын сыбайлас жемқорлық қылмысы үшін сотталып, түрмеде бірнеше жыл отырып шыққан шенеунікке де бір ауданның «Құрметті азаматы» атағы беріліпті деп естідім...

Сондықтан осы, құны қалмаған атақты беруді тоқтатып, оның орнына бәленбай ауданның және бәленбай облыстың «Құрметті меценаты» немесе «Атымтай жомарты» деген жаңа атақ енгізсек қалай болады? Мұндай атақты туған ауылдарына миллиондаған теңгенің әлеуметтік-мәдени ғимараттарын салып берген кәсіпкер азаматтарға және басқа да байларға берсек... Бәлкім, сонда жергілікті басшыларға әркімді салып, атақ сұраушылық мүлдем тыйылар. Ал жаңа атақтың жөні бөлек қой. Даңғой ағайындарға атақ керек болса, атамекендеріне қол ұшын берсін.

Фейсбуктегі жеке парақшасынан

Соңғы жаңалықтар