Тоқаев қолда бар мүмкіндікті толық пайдалануға шақырды

Тоқаев қолда бар мүмкіндікті толық пайдалануға шақырды

Нұр-Сұлтанда ҚР Президенті Қасым-Жомарт Тоқаевтың төрағалығымен Үкіметтің кеңейтілген отырысы басталды. Мемлекет басшысы биылғы экономикалық көрсеткіштер халықтың тұрмысына оң ықпал ететінін айтты. «Күн тәртібі бойынша бірқатар өзекті мәселелер бар. Бұл мәселелер бойынша біз тиісті шешімдерді қабылдауымыз қажет. Алдымен өткен жарты жылдың әлеуметтік-экономикалық даму қортындыларын қарастырамыз. Жалпы, қаңтар-маусым айларында жақсы көрсеткіштерге қол жеткіздік деп айтуға болады. Атап айтсақ, экономикалық өсім 4,1 пайызды құрады. Инфляцияның жылдық көрсеткіші 5,4 пайыз болды», - деді Мемлекет басшысы. Сонымен қатар, Президент негізгі капиталға салынған инвестициялардың көлемі 11,7 пайызға өскенін атап өтті. «Әрине, аталған экономикалық көрсеткіштердің барлығы халықтың тұрмысына оң ықпал етуі тиіс. Қазір осы бағытта тиісті жұмыстарды талқылап, алдағы жоспарларды анықтаймыз. Басты мақсат – қолда бар мүмкіндіктерді , әлеуетімізді толық пайдалану. Аталған жетістіктерімізді еселеуіміз керек», - деді Қасым-Жомарт Тоқаев. Жиынға Үкімет мүшелері, Астана, Алматы және Шымкент қалалары мен облыстардың әкімдері, орталық мемлекеттік органдар мен министрліктердің басшылары қатысуда.