رەسەيدە ءاليا ەسكەرتكىشى اشىلدى

جەڭىس كۇنى قارساڭىندا رەسەيدىڭ سانكت-پەتەربۋرگ قالاسىندا كەڭەس وداعىنىڭ باتىرى، قازاق حالقىنىڭ داڭقتى مەرگەن قىزى ءاليا مولداعۇلوۆانىڭ ەسكەرتكىشى اشىلدى، –  دەپ حابارلايدى Nur.kz سايتى.

ەسكەرتكىشتىڭ اشىلۋى سالتاناتىندا رەسەي فەدەراتسياسىنداعى قر توتەنشە جانە وكىلەتتى ەلشىسى يمانعالي تاسماعامبەتوۆ بۇل باتىر قىزىمىزدى ماڭگى ەستە قالدىرۋ شاراسى عانا ەمەس ەكەنىن، وسى ارقىلى بارلىق ۇلى وتان سوعىسى قاھارماندارىنا، ونىڭ ىشىندە لەنينگرادتى قورعاۋشىلارعا قۇرمەت كورسەتىلىپ وتىرعانىن جەتكىزدى.

«سوعىس تاريح قويناۋىنا ءسىڭىپ، ودان ءارى الىستاي بەرمەك. الايدا ءتۇرلى بۋىندار وكىلدەرى سول ءبىر سۇراپىل جىلدار مەن ميلليونداعان ادامنىڭ قايعى-قاسىرەتىن ءار كەزدە دە ەستە ساقتايتىن بولادى، – دەپ اتاپ ءوتتى ول. – 19 جاسار ءاليانىڭ ەلىن قورعاۋداعى ەرلىگى وشپەك ەمەس. ول ءوزىنىڭ سنايپەرلىك قارۋىمەن 78 ءفاشيستىڭ كوزىن جويىپ قانا قويعان جوق، ءبىزدىڭ ورتاق وتانىمىز ءۇشىن سانالى تۇردە جاستىعى مەن ءومىرىن قۇربان ەتتى».

يمانعالي تاسماعامبەتوۆ رەسەيلىكتەردىڭ باتىرلار داڭقى اسقاقتاتىلۋىنا دەگەن اينىماس ادالدىعى مەن قۇرمەتتەرى ءۇشىن العىس ايتىپ، وسىناۋ كورنەكى ورىنعا كەلۋشىلەر قازاقتىڭ باتىر قىزى ءۇشىن ءبىر كەزدەرى ءوزى تۇرعان، وقىپ، ءبىلىم العان باتىر-قالا لەنينگراد پەن رەسەي جەرى قانشالىقتى قىمبات بولعانىن شىنايى سەزىنىپ، ايقىن كوز جەتكىزەتىنىنە سەنىم ءبىلدىردى.

سالتاناتتى راسىمگە قازاقتىڭ ايتۋلى ءانشىسى، قازاق كسر-ءىنىڭ حالىق ءارتىسى، ءوزىنىڭ ءان الەمىندەگى تانىمالدىلىعى جولىن «ءاليا» ءانىن ورىنداۋمەن باستاعان روزا رىمباەۆا مەن ءاليانىڭ باۋىرى ساپار مولداعۇلوۆ قاتىستى.

باتىر-قالاداعى باتىر قىزدىڭ ەسكەرتكىشى قالالىق گۇلزارلاردىڭ بىرىندە ءوزىنىڭ ەسىمى بەرىلگەن كوشەنىڭ بويىندا ورنالاسقان. قولادان سومدالعان بيىكتىگى ءۇش مەترلىك مۇسىندىك كومپوزيتسيا القىزىل ءمارمار-تۇعىر ۇستىنە قويىلعان. ەسكەرتكىش سانكت-پەتەربۋرگ قالالىق اكىمشىلىگىنىڭ، رەسەيدەگى قازاقستان ەلشىلىگىنىڭ، اقتوبە جانە اتىراۋ وبلىستىق اكىمدىكتەرىنىڭ بىرلەسە كۇش جۇمىلدىرۋىنىڭ ناتيجەسىندە ەڭسە كوتەردى. شىعارماشىلىق جوبانىڭ اۆتورى – بەلگىلى قازاق ءمۇسىنشىسى ەدىگە راحماديەۆ. ونىڭ ايتۋىنشا، جاس تا سىمباتتى باتىر قىز بەينەسىنە ونىڭ مەيلىنشە جاقسى ساقتالعان، بۇرىن ەش جەردە جاريالانباعان فوتوسۋرەتتەرىنىڭ ءبىرى نەگىز ەتىلىپ الىنىپتى. مونۋمەنتتىڭ ماتەريالدارى نەگىزىنەن قازاقستان تاراپىنان جەتكىزىلگەن.

وسى كۇنى ەسكەرتكىشتىڭ اشىلۋى قۇرمەتىنە سانكت-پەتەربۋرگتە مەملەكەتتىك اكادەميالىق كاپەللانىڭ كونتسەرتى ۇيىمداستىرىلدى.

 

ۇقساس جاڭالىقتار

Back to top button