باقىت سۇلتانوۆ پەن ەلجان ءبىرتانوۆ ءار پاتسيەنتتىڭ حال-جاعدايىن ءبىلدى

ەلوردا اكىمى مەن دەنساۋلىق ساقتاۋ ءمينيسترى ءار پاتسيەنتتىڭ حال-جاعدايىن ءبىلدى، دەپ حابارلايدى قالالىق اكىمدىكتىڭ رەسمي سايتى.

بۇگىن نۇر-سۇلتان قالاسىنىڭ اكىمى باقىت سۇلتانوۆ پەن قر دەنساۋلىق ساقتاۋ ءمينيسترى ەلجان ءبىرتانوۆ كەشە ءىرى جول-كولىك وقيعاسىنىڭ سالدارىنان زارداپ شەككەن ازاماتتار ەم قابىلداپ جاتقان قالالىق №2 كوپبەيىندى اۋرۋحانادا بولىپ قايتتى.

ەلوردا اكىمى مەن دەنساۋلىق ساقتاۋ ءمينيسترى ءار پاتسيەنتكە بارىپ، ونىڭ حال-جاعدايىن سۇراستىردى.

«تەزىرەك جازىلۋىڭىزدى تىلەيمىن. سىزگە بىلىكتىلىگى جوعارى ۇزدىك دارىگەرلەر كومەك  كورسەتىپ جاتىر. ايىعىڭىز!»، – دەدى باقىت سۇلتانوۆ.

اۋرۋحانانىڭ باس دارىگەرى يۆان ءليدىڭ ايتۋىنا قاراعاندا، قازىر ستانتسيوناردا 13 ادام ەم قابىلداۋدا. ولاردىڭ سەگىزىنىڭ جاعدايى ورتاشا (ولار تراۆماتولوگيالىق بولىمدە ەمدەلۋدە). ەكى پاتسيەنت كەۋدە بولىگىنىڭ حيرۋرگياسى بولىمىندە. ءۇش ادامنىڭ جاعدايى اۋىر. ولار جان ساقتاۋ بولىمىندە جاتىر.

«كەشە ءبىز ومىرگە قاۋىپ توندىرەتىن بەلگىلەر بويىنشا 5 وتا جاسادىق. بۇل وتە كۇردەلى وپەراتسيالاردىڭ  سپەكترى بولدى. اتاپ ايتقاندا، ءىشاستار ىشىنە قان كەتۋدى توقتاتۋ، مەلجەمدەلگەن اياق-قولدىڭ مەتاللووستەوسينتەزى، امپۋتاتسيا سياقتى وتالار. ءبىر ايەلدىڭ اياعىنا، وكىنىشكە وراي، امپۋتاتسيا جاساۋعا ءماجبۇر بولدىق»، – دەپ مالىمدەدى يۆان لي.

اۋرۋحانانىڭ باس دارىگەرىنىڭ ايتۋىنا قاراعاندا، كەيبىر پاتسيەنتتەر ۇزاق ەم قابىلداۋى كەرەك. ال ەندى ءبىرىن 7-10 كۇننەن كەيىن ۇيىنە جىبەرەدى.

بۇدان بۇرىن حابارلاعانىمىزداي، كەشە تاڭەرتەڭ قابانباي باتىر داڭعىلىندا 3 اۆتوبۋس پەن بىرنەشە جەڭىل كولىكتىڭ قاتىسۋىمەن جول كولىك وقيعاسى ورىن العان بولاتىن. قالا ماڭىنا قاتىنايتىن № 303 باعدارلى اۆتوبۋس № 12 باعدارلى اۆتوبۋستى سوقتىعىسقان-دى.

جكو-نىڭ ناتيجەسىندە ەكى ادام مەرت بولىپ، ءتۇرلى جاراقات العان 36 ادام اۋرۋحاناعا جاتقىزىلدى.

ەلوردا اكىمى اپات سالدارىنان قازا بولعان ازاماتتاردىڭ وتباسىلارىنا كوڭىل ايتىپ، ءتيىستى ورگاندارعا ولارعا جانە اپاتتان زارداپ شەككەندەرگە جان-جاقتى كومەك كورسەتۋدى تاپسىردى.

جكو-نىڭ سەبەپتەرى انىقتالىپ جاتىر.

ۇقساس جاڭالىقتار

Back to top button