مۇعالىمنىڭ ايلىعى 300 مىڭ تەڭگە بولۋى كەرەك

قازاقستان رەسپۋبليكاسى ءبىلىم جانە عىلىم قىزمەتكەرلەرى كاسىپوداعى توراعاسىنىڭ ورىنباسارى ايگۇل مۇقاشەۆا مۇعالىمنىڭ ايلىعى 300 مىڭ تەڭگەدەن كەم بولماۋى كەرەك دەپ ەسەپتەيدى، دەپ حابارلايدى قازاقپارات.

«پەداگوگتاردىڭ ايلىق اقىسىن ەسەپتەۋ ءۇشىن پايدالانىلاتىن بازالىق ينديكاتور – بازالىق لاۋازىمدىق جالاقىنى (بلج) كۇنكورىس مينيمۋمىنا اۋىستىرۋدى ۇسىنامىز. ەگەر مۇنداي وزگەرىس ەنگىزىلەتىن بولسا، ءبىزدىڭ پەداگوگتاردىڭ ايلىعى ەكى ەسەگە ارتاتىن ەدى»، – دەيدى ايگۇل مۇقاشەۆا قازاقستاندىق ءبىلىم جانە عىلىم قىزمەتكەرلەرى كاسىپوداعىنىڭ ۇيىمداستىرۋىمەن استانادا ءوتىپ جاتقان دوڭگەلەك ۇستەلدە.

ونىڭ ايتۋىنا قاراعاندا، قازىرگى ۋاقىتتا ەلىمىزدە مۇعالىمدەردىڭ ەڭبەكاقىسى ورتاشا ەسەپپەن 102 مىڭ تەڭگە.

«ءبىزدىڭ ويىمىزشا، ءبىزدىڭ مۇعالىمدەردىڭ ايلىعى 300 مىڭ تەڭگەدەن كەم بولماۋى كەرەك. ەگەر وسىلاي ەتە الساق، مۇعالىم ماماندىعىنا جاستار بارار ەدى. سەبەبى، قازىرگى ۋاقىتتا مۇعالىمنىڭ ايلىعى از بولعاندىقتان، جاس بۋىننىڭ مەكتەپكە جۇمىسقا بارعىسى كەلمەيتىنى ەشكىمگە قۇپيا ەمەس. ال بىزگە مەكتەپتە ءدال قازىر كرەاتيۆتى باعدارلامالارمەن جۇمىس ىستەي الاتىن ويلى جاستار كەرەك. ەگەر مۇعالىمگە جاقسى ايلىق بەرە بىلسەك، ول بارىن سالىپ، جانىن سالىپ جۇمىس اتقاراتىن بولادى. بىراق، قازىردىڭ وزىندە تومەن ايلىققا قاراماستان، ءبىزدىڭ مۇعالىمدەر وتە جاقسى ناتيجەمەن جۇمىس اتقارۋدا»، – دەيدى ول.

ۇقساس جاڭالىقتار

Back to top button