Магнитогорскіде үйдің құлауынан қаза тапқандар саны 14 адамға жетті 

Магнитогорскідегі тұрғын үйдегі жарылыстан қаза тапқандардың саны артты. Екі күн ішінде қирандылардың астынан 14 адамның денесі табылды, деп жазды «Хабар 24». Тағы 30-дан астам тұрғынның тағдыры әлі белгісіз. Төтенше жағдайлар министрлігі «100-ден астам құтқарушы тартылғанымен, қирандыларды аршу жұмысы бірнеше күнге жалғасады» дейді. Апатты жағдайдағы үйдің қалған қабырғалары құлап кетпес үшін ауыр техникалар қолданылып жатқан жоқ. Естеріңізге салсақ, Магнитогорскіде желтоқсанның 31-де таңғы сағат 4-тің шамасында 9 қабатты үйде тұрмыстық газ жарылды.  Салдарынан 26 пәтерлік тұтас бір подъезд опырылып ортасына түсті. Аталған пәтерлерде 46 адам тұрған.  Осы  іс бойынша тергеу амалдары жүргізілуде. Алдын ала болжамға сәйкес, тұрмыстық газды қолдануда сақтық ережесі өрескел бұзылған.