Қазақстанда жаңа академия құрылады

Қазақстанда жаңа академия құрылады

Академияны «Қазақстанның киберқалқаны» тұжырымдамасы аясында ашу жоспарланған, деп xабарлайды ҚазАқпарат тілшісі. ҚР Қорғаныс және аэроғарыш өнеркәсібі вице-министрі Тимур Шәймергеновтың айтуынша, жаңа академияда киберқауіпсіздікке үйретеді. Осыған орай, әлемнің жетекші компанияларымен әріптестік байланыс орнату шаралары атқарылуда. «Қазіргі кезде біз киберқауіпсіздік академиясын құру бойынша ұйымдастыру-құқықтық мәселелерді зерделеп жатырмыз. Осы жұмысқа мықты компаниялар тартылады. Олардың ішінде Түркия, Израиль және Ресей компаниялары бар. Академия мемлекеттік-жекеменшік серіктестік негізінде жұмыс істейтін болады», - деді Т.Шәймергенов ҚР Парламент Сенатында өткен жиында. Оның айтуынша, биыл өнеркәсіптік киберқауіпсіздік бойынша ұлттық орталық құрылған болатын. Аталған құрылым Transtelecom-мен бірлесіп жасалды. Оның негізгі мақсаты - стратегиялық маңызы бар нысандардың киберқауіпсіздігін қамтамасыз ету. «Дәл осы орталықтың негізінде киберқауіпсіздік академиясы да жұмыс істейтін болады. Сол жерде жекеменшік және квазимемлекеттік салалар үшін кәсіби киберқауіпсіздік мамандарын даярлауға болады», - деп атап көрсетті Т.Шәймергенов.