شىمكەنتتەن دۋبايعا ۇشاتىن رەيس اشىلادى

«Fly Dubai» اۋە كومپانياسى شىمكەنت – دۋبايعا باعىتىندا ۇشاتىن بولدى، دەپ حابارلايدى قازاقپارات قر يدم ازاماتتىق اۆياتسيا كوميتەتىنە سىلتەمە جاساپ.

«قازاقستان رەسپۋبليكاسى ينۆەستيتسيالار جانە دامۋ مينيسترلىگىنىڭ ازاماتتىق اۆياتسيا كوميتەتى حالىقارالىق باعىتتاعى جاڭا رەيستەردى اشۋ جانە قولدانىستاعى باعىتتارداعى جيىلىكتەردى ارتتىرۋ بويىنشا جۇمىستاردى جالعاستىرىپ كەلەدى.

بۇل رەتتە، 2018 جىلعى 29 جەلتوقساننان باستاپ بىرىككەن اراب امىرلىكتەرىنىڭ Fly Dubai اۋە كومپانياسى شىمكەنت – دۋباي جاڭا رەيسىن اشۋدى جوسپارلاپ وتىر»، – دەلىنگەن كوميتەتتىڭ فەيسبۋكتەگى پاراقشاسىندا. شىمكەنت – دۋباي – شىمكەنت باعىتىنداعى رەيستەر اپتاسىنا ەكى رەت سەيسەنبى جانە سەنبى كۇندەرى Boeing 737 ۇشاعى ورىندايدى. سونىمەن قاتار، جولاۋشىلارعا ىڭعايلى بولۋ ءۇشىن جانە تۋريستىك ماۋسىم مەن مەرەكە الدىنداعى كەزەڭدە سۇرانىستى قاناعاتتاندىرۋ ءۇشىن Fly Dubai اۋە كومپانياسى 2019 جىلدىڭ كوكتەمىنەن باستاپ استانا – دۋباي – استانا باعىتى بويىنشا اپتاسىنا ورىندالاتىن رەيستەر جيىلىگىن 4-5 رەيسكە دەيىن كوبەيتۋدى جوسپارلاپ وتىر.

كوميتەت اتالمىش رەيس قازاقستان مەن بىرىككەن اراب امىرلىكتەرى اراسىنداعى ساۋدا-ەكونوميكالىق بايلانىستاردى نىعايتۋعا، سونداي-اق بيىلعى جىلى رەسپۋبليكالىق ماڭىزى بار قالا اتانعان شىمكەنتتىڭ الەۋەتىن دامىتۋعا ىقپال ەتەدى دەپ ءمالىم ەتتى.

ۇقساس جاڭالىقتار

Back to top button