تاسىلعان تالاي جۇگىڭ وسى جەردەن

«نۇرلى جول» باعدارلاماسى بويىنشا قۇرىق پورتى ارقىلى ەكسپورتتىق، يمپورتتىق جانە ترانزيتتىك جۇكتەر جونەلتىلۋدە. كەشەن جىلىنا 4 ملن تونناعا دەيىن جۇك تاسىمالداۋعا قاۋقارلى.

قۇرىق پورتى كاسپي تەڭىزىنىڭ شىعىسىندا جاتقان شىعاناق. ول اقتاۋ ايلاعىنان وڭتۇستىكتە ورنالاسقان. تابيعي ءمۇيىس پورتتىڭ قىسى-جازى توقتاۋسىز قىزمەت كورسەتۋىنە قولايلى تاڭدالعان. كولىكتىك-لوگيستيكالىق ينفراقۇرىلىم قاراقيا اۋدانىنا قاراستى قۇرىق اۋىلىنان 17 شاقىرىم قاشىقتا. پورت پەن اۋىلدى بورجاقتى-ەرساي تەمىرجول جەلىسى بايلانىستىرادى.

ءىرى جوبا ەلدى مەكەننىڭ الەۋمەتتىك-ەكونوميكالىق جاعدايىنىڭ جاقسارۋىنا سەپتىگىن تيگىزىپ، جۇرتشىلىقتىڭ الەۋەتىن كوتەرۋگە سەبەپشى بولعان. بىلتىر 740-قا جۋىق ادام كەشەندەگى قۇرىلىس جۇمىسىنا تارتىلسا، بيىل پورتتا 300-دەن استام ادام تۇراقتى جۇمىس تاپتى. مۇنىڭ سىرتىندا پورتتىڭ قىزمەتىنە قاجەتتى زاتتاردى قامتاماسىز ەتۋ ءۇشىن جەكەمەنشىك مەردىگەر كومپانيالار اشىلۋدا.

«قۇرىق پورتى كەشەنىندەگى ينفراقۇرىلىمىنىڭ جۇرگىزىلۋى جاڭا جوبالاردىڭ، كولىكتىك-ينفراقۇرىلىمنىڭ دامۋىنا، جاڭا سەرۆيستىك قىزمەتتەردىڭ جۇزەگە اسۋىنا ىقپال ەتۋدە. دەمەك ءوز كەزەگىندە جاڭا كاسىپكەرلىكتىڭ قارقىنى ارتادى دەپ كۇتەمىز»، – دەيدى قاراقيا اۋدانىنىڭ اكىمى قىدىربەردى بەكوۆ.

قۇرىق پورتىنىڭ جەرگىلىكتى بيۋدجەتكە كەلتىرەتىن كىرىسى دە قوماقتى. بۇل سوما 2017 جىلى 41 ملن تەڭگەدەن اسىپ، بيىل جىل باسىنان بەرى 33 ملن تەڭگەگە دەيىن جەتتى. بۇل تەك ءبىر ەلدى مەكەنگە كەلتىرگەن تابىسى، ال الداعى ۋاقىتتا تۇتاس قازاقستاننىڭ ەكونوميكاسىندا دا الاتىن ورنى ەرەكشە بولماق.

«قازىرگى تاڭدا قۇرىق پورتى كەشەنى ارقىلى ەكسپورتتىق، يمپورتتىق جانە ترانزيتتىك جۇكتەر جونەلتىلۋدە. قىتايدان، قىرعىزستاننان، وزبەكستاننان ترانزيتتىك جۇكتەر وسى قۇرىق پورتى ارقىلى ءازىربايجان، ودان كەيىن ەۋروپاعا جونەلتىلەدى. ەلىمىزدە ءوتىپ جاتقان ۇلى جىبەك جولى باعىتى بويىنشا تاسىمالداناتىن جۇكتەردىڭ ارتۋىنا قۇرىق پورتى ءوز ۇلەسىن قوسۋدا»، – دەيدى قۇرىق پورتى باس ديرەكتورىنىڭ ورىنباسارى تالعات وسپانوۆ.

بىلتىر تەمىرجول پارومى تەرمينالى 1،5 ملن توننا جۇك تيەدى. پورتقا 320 كەمە كەلدى. ال بيىل 15،2 مىڭ ۆاگون جانە 306 اۆتوكولىككە قىزمەت كورسەتىلگەن.

ايتا كەتەرلىگى، قۇرىق پارومدىق كەشەنى جىلىنا 4 ملن تونناعا دەيىن جۇك تاسىمالداۋعا قاۋقارلى. ال اقتاۋ تەڭىز ساۋدا پورتىن قوسا العاندا 2020 جىلعا قاراي 25 ملن تونناعا دەيىن جۇك جەتكىزۋگە مۇمكىندىك بار.

ۇقساس جاڭالىقتار

Back to top button