تۇركىستان سوتى "زورلانعان بالا" ءىسىن قاراي باستادى

قىركۇيەكتىڭ 26-سى كۇنى شىمكەنتتەگى تۇركىستان وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى سارىاعاش اۋدانى اباي اۋىلىندا «زورلانعان بالانىڭ» ءىسى بويىنشا سوت تەرگەۋىن جابىق ەسىك جاعدايىندا قاراي باستادى.

ىسكە توراعالىق ەتىپ جاتقان ساميددين تەمىراليەۆتىڭ ايتۋىنشا، سوت تەرگەۋى قىلمىستىق كودەكستىڭ 121-بابى بويىنشا («سەكسۋالدىق سيپاتتاعى زورلىق-زومبىلىق ارەكەتتەر») قارالىپ جاتىر. ايىپتالۋشى – 2002 جىلى تۋعان كامەلەتكە تولماعان بالا. جابىرلەنۋشى دە كامەلەتكە تولماعان. ايىپتالۋشى دا، جابىرلەنۋشى دە، ولاردىڭ زاڭدى وكىلدەرى مەن ادۆوكاتتارى دا سوت وتىرىسىنا قاتىسىپ جاتىر. ءىستى 12 سۋديادان قۇرالعان القا بي قارايدى.

تامىز ايىندا قازاقستان باس پروكۋراتۋراسىنىڭ تەرگەۋ توبى تۇركىستان وبلىسى (بۇرىنعى وڭتۇستىك قازاقستان وبلىسى) اباي اۋىلىندا «زورلانعان بالا» ءىسى بويىنشا 14 كەشەندى سوت ساراپتاماسى مەن ءتورت ءتۇرلى زەرتتەۋ جۇرگىزىلگەنىن مالىمدەگەن.

«ء;تورت كۇدىكتىنىڭ ىشىندە بىرەۋى عانا 14 جاسقا تولعان. ونىڭ ءىسى قىلمىستىق كودەكستىڭ 121-بابىنىڭ 4-بولىگىنە («كامەلەتكە تولماعان بالاعا قاتىستى سەكسۋالدىق سيپاتتاعى زورلىق-زومبىلىق ارەكەتتەرى») سايكەس دەپ تانىلدى. قالعاندارىنا قاتىستى قىلمىستىق ءىس توقتاتىلدى. سەبەبى ولار 14 جاسقا تولماعان. وقيعانىڭ باسقا ءمان-جايى جاريالانبايدى» دەپ حابارلاعان باس پروكۋراتۋرانىڭ ءباسپاسوز قىزمەتى.

بيىل 13 ناۋرىزدا سارىاعاش اۋدانىنداعى اباي اۋىلىندا تۇراتىن شاريپا باتىربەكوۆا جەتى جاستاعى جيەنىن 2017 جىلدىڭ تامىزىنان بەرى جوعارعى سىنىپ وقۋشىلارى بىرنەشە مارتە «ۇرىپ، زورلاعانىن» ايتقان. ول جەرگىلىكتى پوليتسياعا دەر كەزىندە شاعىمدانعانىمەن، تەك ءۇشىنشى رەت بارعاندا عانا ارىزىن قابىلداعانىن جەتكىزگەن. بۇل حابار الەۋمەتتىك جەلىگە كەڭ تاراپ، جەرگىلىكتى باق-تىڭ نازارىنا ءىلىنىپ، الەۋمەتتىڭ اشۋ-ىزاسىن تۋدىرىپ، قاتتى تالقىلاۋعا ۇلاسقان.

ۇقساس جاڭالىقتار

Back to top button