استانا – ۇلى دالا جاۋھارى

وڭتۇستىك كورەيا استاناسى سەۋل قالاسىندا قازاقستاندىق فوتوسۋرەتشىلەردىڭ كورمەسى ءوتتى. سەۋل تۇرعىندارى مەن قالا قوناقتارى استانانىڭ كورىكتى جەرلەرىن فوتوسۋرەتتەر ارقىلى تاماشالاۋعا مۇمكىندىك الدى. «استانا – ۇلى دالا جاۋھارى» اتتى فوتوكورمەنى تۇڭعىش پرەزيدەنت – ەلباسى قورى ۇيىمداستىرعان. قازاقستاندىق فوتوگرافتاردىڭ 40-قا جۋىق تۋىندىسى كورمەگە ارنايى تاڭداپ الىنىپتى. ونان بولەك وتاندىق ارتىستەردىڭ ونەرى دە اتالعان شاراعا ۇلتتىق ناقىش بەرە بىلگەن. كورمەگە كەلگەن سول چە حون ەسىمدى كورەرمەن: «مەن الماتى مەن استانادا ون رەت بولدىم. دوستارىممەن بىرگە مۇراجايلار مەن وزگە دە كورىكتى جەرلەردى ارالادىم. بۇگىن كورمەنى ارالاپ، قازاقستانعا قايتا ورالعانداي بولدىم. از ۋاقىتتىڭ ىشىندە وسىنداي جاس ەلوردانىڭ قۇرىلعانىنا، ەلدىڭ دامۋ قارقىنىنا تاڭعالدىم»، – دەپ سۇحبات بەردى. وسى مادەني شارا بارىسىندا كورەيا مەن قازاقستان تاراپتارى اراسىنداعى مادەني، گۋمانيتارلىق مەموراندۋمىنا قول قويدى. ەكى ەل وكىلدەرى وسى جىلدىڭ سوڭىنا دەيىن يادرولىق قارۋسىزداندىرۋ ماسەلەسىنە قاتىستى ەكسپەرتتىك دوڭگەلەك ۇستەلدەر وتكىزەتىن بولىپ كەلىستى. سونىمەن قاتار كورەي مەملەكەتى دە قازاقستاندا مادەنيەت كۇندەرىن وتكىزۋگە مۇمكىندىك الىپ وتىر. «استانا – ۇلى دالا جاۋھارى» كورمەسى وسى ۋاقىتقا دەيىن الەمنىڭ 9 ەلىندە كورسەتىلدى. جۋىردا ەلوردامىزدىڭ كورىكتى جەرلەرىن سيپاتتايتىن كورمە تۇماندى البيون ەلىنە ساپار شەكپەك.

 

ۇقساس جاڭالىقتار

Back to top button