قازاقستاندا ۇبت-نى قايتا تاپسىرۋ باستالدى

قازاقستاندا 15 تامىزدان باستاپ ۇلتتىق بىرىڭعاي تەستىلەۋدى قايتا تاپسىرۋ جانە كەشەندى تەستىلەۋ باستالدى، دەپ حابارلايدى Baq.kz اقپارات اگەنتتىگى قر ءبىلىم جانە عىلىم مينيسترلىگىنە سىلتەمە جاساپ.

تەستتى قايتا تاپسىرعىسى كەلگەندەر اعىمداعى جىلدىڭ 25 شىلدەسىنەن 3 تامىز ارالىعىندا ءوتىنىش بەرگەن. بۇگىندە ولاردىڭ سانى 40 718 ادامدى قۇرادى. جالپى، ءوتىنىش بەرۋشىلەردىڭ 66 پايىزى ۇبت مەن كت-نى قازاق تىلىندە، 33 پايىزى – ورىس تىلىندە جانە 11 ادام اعىلشىن تىلىندە تاپسىرماقشى.

بۇگىندە، قايتا تەستىلەۋدەن ءوتۋ اقىسى – 2 242 تەڭگە، قازپوشتا نەمەسە حالىق بانك ارقىلى تولەۋگە بولادى.

قر بعم حابارلاعانداي، ۇبت-نى قايتا تاپسىرۋدىڭ بىرنەشە سەبەبى بار. سونىمەن، تۇلەكتەر ۇپاي سانى شەكتىك بالعا جەتپەي قالسا، ناتيجەسى جويىلسا نەمەسە ۇبت/كت-عا قاتىسپاسا ەمتيحاندى قايتا تاپسىرادى.

«بۇل جولى بەس ءپان بويىنشا سۇراقتارعا تولىق ءبىلىم بەرەتىن بولىمدە وقىعىسى كەلەتىن 18500 ادام جاۋاپ بەرەدى، ال قىسقارتىلعان باعدارلاما بويىنشا ءبىلىم العىسى كەلەتىن 22 218 ادام ەكى پاننەن عانا تاپسىرادى»، – دەيدى ماماندار.

ۇلتتىق بىرىڭعاي جانە كەشەندى تەستىلەۋ اعىمداعى جىلدىڭ 19 تامىزىنا دەيىن 40 جوو بازاسىندا جالعاسادى.

ايتا كەتەيىك، قايتا تاپسىرىلعان تەستتىڭ قورىتىندىسى سول كۇنى ۇلتتىق تەستىلەۋ ورتالىعىنىڭ سايتىندا جاريالانادى. ال، ەگەر كەلىسپەۋشىلىكتەر بولىپ جاتسا اپەلياتسيانى سول كۇنى تۇسكە دەيىن تاپسىرىپ ۇلگەرۋ كەرەك.

ۇقساس جاڭالىقتار

Back to top button