Жаңа туған сәбиді дәретхананың ішіндегі шелекке тастап кеткен

Қостанай облысының тұрғыны Затобол ауруханасында туып, жаңа туған сәбиді дәретхананың ішіндегі шелекке тастап кеткен. Бұл туралы «Алау» ақпараттық порталына сілтеме жасап, Tengrinews хабарлайды. 27 жастағы әйелді ауруханаға іш ауруы симптомымен жеткізген. Қабылдау бөлмесінде одан анализ тапсыру сұралған. Ол дәретханаға барып келген соң, дәрігерлер күмәнданып артынан барып, сәбиді шелектің ішіне тастап кеткенін көрген.  "Ол әйел жүкті екенін жасырды. Дәртеханаға барып, өзі туған. Жаңадан туған сәбиін шелекке лақтырып кетті. Дәрігерлердің дереу дабыл соққанының арқасында баланы аман алып қалдық. Оған жедел түрде барлық көмек түрі көрсетілді. Оның өміріне еш қауіп жоқ. 7 тамыз күні бала мен анасы Қостанай облыстық ауруханасына тапсырылды", - дейді Қостанай облыстық ауруханасының бас дәрігері Юрий Моисеев. Жаңа туған баланы қалдырып кету дерегіне қатысты сотқа дейінгі тергеу басталды.