ШЕТЕЛ ТАЛАПКЕРЛЕРІНІҢ ТАҢДАУЫ – ҚАЗҰУ
ШЕТЕЛ ТАЛАПКЕРЛЕРІНІҢ ТАҢДАУЫ – ҚАЗҰУ
Алыс және жақын шетелден 150-ден астам талапкер 2018-2019 оқу жылында ҚазҰУ-ға оқуға түсу үшін университеттің онлайн жүйесі арқылы тіркеліп, құжаттарын тапсырған. Бұл өз кезегінде уақыт пен қаржылай шығындарды азайтады. Аталған талапкерлер университет тарапынан растау алды, ендігі кезекте ЖОО-ға қашықтықтан қабылдана алады. Қызметтің бұл түрін Бразилия, АҚШ, Франция, Германия, Индонезия, Оңтүстік Корея, Түркия, Үндістан және тағы басқа мемлекеттердің азаматтары қолданып үлгерді. ҚазҰУ-дың оқу ісі жөніндегі проректоры Асқар Хикметов атап өткендей, биылғы жылы шетелдік студенттердің үлкен легі, нақты айтсақ 600-ден астам талапкер келмек. Сырттан келетін білім ізденушілердің көбісі, Қазақ ұлттық университетіндегі жоғары халықаралық стандарттарға сай келетін білім беру бағдарламаларын, ағылшын тілінде оқу мүмкіндігі және заманауи кітапхана, студенттерге қызмет көрсету орталығы, спорт кешені және жайлы жатақханалар орналасқан бірегей кампусқа қызығушылық танытады. ҚазҰУ-да олар сапалы білім ғана алып қоймай, өздерінің ғылыми және шығармашылық әлеуетін шыңдайды. Шетелдік студенттер тарапынан жалпы медицина, ақпараттық жүйелер, халықаралық қатынастар, менеджмент, биотехнология, қазақ және орыс тілдерін оқуға деген сұраныс өте жоғары.