Қазақстандық «Qazaq Air» әуе компаниясының аймақтық әуе қатынастары желісі кеңеймек. Аталмыш әуе компаниясы үстіміздегі жылдың 17 қыркүйегінен бастап жаңа бағыт ашады.
«Qazaq Air» әуе компаниясы ұсынып отырған Алматы – Қостанай рейсі 2 сағат 35 минутқа созылады. Бұл бағыт бойынша жолаушыларға 78 орындықтан тұратын Bombardier Q400 жаңа ұшағы қызмет етеді. Алматы – Қостанай бағытында ұшу құны бір бағытқа 15 496 теңгеден басталады. Бағыт бойынша қызмет көрсету санаты – эконом класс.
Сондай-ақ, әуе компаниясы таяу аралықта Қазақстанның батыс аймағында да жаңа бағыттар ашуды жоспарлап отыр. Яғни, алдағы уақытта «Qazaq Air» әуе компаниясы Шымкент – Ақтөбе, Ақтөбе – Атырау, Қостанай – Ақтөбе бағыттары бойынша да қызмет көрсетеді.