МЕМЛЕКЕТТІК ТІЛ ҚАЖЕТТІЛІККЕ АЙНАЛА БАСТАДЫ «А» корпусына талапкерлер қазақ тілінен сынақтан өтеді

 

«Мемлекеттік қызмет туралы» Заңда осы талапты енгізу үшін
біраз депутаттар тер төгіп, онысынан ештеңе өнбеген болатын. Былтырдан бері мемлекеттік
қызметке өзгеше реформа жасауды қолға алған Мемлекеттік қызмет туралы агенттіктің
қолға алған істерінің бірі осы көрінеді.

Аталған агенттіктің басшысы Әлихан Бәйменов мемлекеттік
шенеуніктердің «А» корпусын жасақтайтыны жайында былтыр күзде мәлім еткен еді. Енді
соның алғашқы сатысы басталып та кеткен екен. Мемлекеттік қызметтің «А» басқару
корпусы лауазымдарына өткісі келетін үміткерлер міндетті түрде қазақ тілінен
тест тапсырады. Олар ҚАЗТЕСТ жүйесі арқылы жүзден астам тапсырмалар орындайды.
Мемлекеттік қызмет реформалары аясында мемлекеттік басқару саласындағы қызметкерлердің
қазақ тілін меңгеру деңгейіне назар салынуда.

dd1cd32697a4c41a593c16bb84fad25e.jpg

«А» корпусы кадр резервіне өткісі келетін үміткерлерді
тестілеу бірнеше кезеңді қамтиды. Алғашқы күні кандидаттар заңды білу және тұлғалық
және басқарушылық біліктілік деңгейін (этикалық қасиеттері, қарым-қатынас жасай
білуі, бәсекені бағдар тұтуы, сапаны бағдар тұтуы) анықтау бойынша компьютерлік
тестілеуден өтеді. Ал осы тест түрінен оң нәтижеге жеткен үміткерлер келесі
кезеңге жіберіледі: олар қисынды вербалды емес тест тапсырумен қатар
мемлекеттік тілді білу деңгейі анықталатын тестілеуден өтеді. Тестілеу Астанада
Мемлекеттік қызмет істер Агенттігі ғимаратында кестеге сәйкес 15-27 мамыр аралығында
болады. Сынақ өтетін залдар бейне бақылау камераларымен жабдықталған, ақпараттық
қауіпсіздік үшін жауапты тұлғалар анықталған.

Мемлекеттік тілден өтетін тест үш бөліктен тұратынын
айтады ҚАЗТЕСТ жүйесі, Ұлттық тестілеу орталығы басқарма жетекшісіАйдос
Әбдіхалықов. Бірінші бөлік – тыңдалым (тыңдап түсінуді бағалау), екінші
бөлік – лексика-грамматикалық бөлік (қазақ тілінің лексика-грамматикалық құрылымдарын
күнделікті тілдік қатысым барысында пайдалану дәрежесін бағалау), үшінші бөлік
– оқылым (оқып түсінген материалдарды бағалау). Жалпы тест 150 тапсырманы қамтиды.
Тестілеу қорытындысы бойынша талапкердің мемлекеттік тілді білу деңгейі анықталады.
«А» корпусы кадр резервіне өту үшін 2 мыңға жуық талапкер құжаттарын тапсырған
болатын.

«А» корпусына бірінші кезекте министрліктердің жауапты
хатшылары мен облыс әкімдерінің аппарат жетекшілері, комитет төрағалары,
облыстық деңгейдегі қала және аудан әкімдері сияқты лауазымдар кіреді. Мемлекет
басшысы Нұрсұлтан Назаpбаев өзінің халыққа Жолдауында кәсіпқой басқарушылардың
мүлдем жаңа санаты – «А» корпусы мемлекеттік саясаттың нақты бағыттарын жүзеге
асыруға жауапты болатындығын атап көрсеткен. Ол бұдан былай мемлекеттік қызметші
лауазымдық сатымен кезең-кезеңмен, билік иерархиясының бір сатысынан келесісіне
өзінің машығын жетілдіре және кәсіби деңгейін арттыра отырып көтерілетін
болатындығын айтқан.

Back to top button