جاڭالىقتار

ايلىعىڭ قانشا، شەنەۋنىك؟

سوڭعى دەرەكتەرگە سۇيەنسەك، قازاقستاندىق ورتاشا جالاقى مولشەرى 2013 جىلدىڭ ساۋىرىندە 105289 تەڭگە بولسا، ەڭ جوعارى ايلىق – 210 مىڭ تەڭگە. ەلىمىز­دەگى ەڭ تومەنگى جالاقى  اۋىل­شارۋاشىلىعى سالاسىندا تەر توگىپ جۇرگەندەرگە تيەسىلى. سان­دىق كورسەتكىشتەرگە شاقساق، 48 مىڭ تەڭگە.

جۋىردا كوپشىلىك الدىندا اعىنان جارىلعان ءۇش شەنەۋنىك – قر الەۋمەتتىك قورعاۋ جانە ەڭبەك ءمينيسترى سەرىك ابدەنوۆ، قر يندۋس­تريا جانە جاڭا تەحنولوگيالار ءمينيسترى اسەت يسەكەشەۆ جانە قر ءدىن ىستەرى جونىندەگى اگەنتتىك توراعاسى قايرات لاما شاريف اي سايىن 600 مىڭ تەڭگە كولەمىندە ايلىق الاتىندارىن ايتقان ەدى. وسى يگى باستاما وسكەمەندە جالعاستى.  «وزىڭنەن باستا» دە­گەن تاقىرىپپەن وتكىزىلگەن شارا­عا اتسالىسقان 6 شەنەۋنىكتىڭ ءبىرى – وسكەمەن قالالىق قارجى ءبولىمىنىڭ جەتەكشىسى ا. بۇقاباەۆا ايىنا 193 مىڭ تەڭگە، ونىڭ كومەكشىسى گ.داۆىدوۆا 166 مىڭ تەڭگە العان. سونىمەن قاتار، قالالىق ىشكى ساياسات ءبولىمىنىڭ باسشىسى ب.باكينوۆا تيەسىلى جالاقى 2 ملن. تەڭگەدەن اسسا، وسى ءبولىمنىڭ مەڭگەرۋشىسى ل.ەكيموۆا قىركۇيەك پەن جەلتوقسان اراسىندا 624 مىڭعا جۋىق ايلىق العان. وسكەمەندىك شەنەۋنىكتەر اراسىنداعى ەڭ كوپ ايلىق وسكەمەن وبلىستىق ءبىلىم ءبولىمىنىڭ باسشىسى كۋزنەتسەۆكە تيەسىلى – 2 ملن 642 مىڭ 834 تەڭگە. بۇگىندە ونىڭ زەينەتاقى جيناقتاۋ قورىنداعى قاراجاتى 1 ملن. 676 مىڭ 905 تەڭگە كورىنەدى. جالاقى مولشەرىن جۇرتقا جايىپ سالعان مەملەكەتتىك قىزمەتكەرلەر جەكەمەنشىكتەگى ءۇي-جايى، جىل­جىمايتىن مۇلىكتەرى تۋرالى دا اشىق ايتتى. كىسىنىڭ قالتاسىنا كوز ساتۋ – جامان ادەت. الايدا، شەنەۋنىكتەر الاتىن ايلىق قارا­پايىم حالىقتىڭ، ياعني، سالىق تولەۋشىلەردىڭ قالتاسىنان شىعا­تىنىن ەسكەرسەك، ءار تيىننىڭ ەسەبىن بىلگەن ابزال. بۇل قازاق قوعامىنداعى جەمقورلىق دەرتىنىڭ اسقىنۋىنا دا كەدەرگى بولارى انىق. دەمەك، وسكەمەندىكتەردىڭ يگى باستاماسى قازاقستانداعى بارلىق مەملەكەتتىك ورگانداردا قىزمەت ەتەتىن اعايىنعا ۇلگى بولسا جارادى.

نۇرگۇل ماحانبەتياروۆا،

قازۇۋ-دىڭ ءى كۋرس ستۋدەنتى 

Back to top button