بايسەركەدە اشىلعان جاڭا بالاباقشا

الماتى وبلىسىندا بيىلعى جىلى «بيزنەستىڭ جول كارتاسى – 2020» باعدارلاماسى اياسىندا بىرقاتار ناقتى شارالار جۇزەگە اسىرىلىپ كەلەدى. وبلىس اكىمى اڭسار مۇساحانوۆتىڭ قولداۋىمەن، اتالمىش باعدارلامانىڭ نەگىزىندە 3 مىڭ كاسىپكەرگە قولداۋ شارالارى كورسەتىلگەن. بۇل مەملەكەتتىك قولداۋ 9،4 ملرد.تەڭگەنى قۇراپ وتىر. ولاردىڭ اراسىندا 29 جوبا بويىنشا 3،2 ملرد.تەڭگەگە سىرتقى ينفراقۇرىلىم قۇرىلىسى قامتاماسىز ەتىلدى. اتالمىش باعدارلامانى جۇزەگە اسىرۋ بويىنشا 9 مىڭعا جۋىق جۇمىس ورنى ساقتالسا، 2 مىڭعا جۋىق جاڭادان جۇمىس ورنى اشىلدى. 

باعدارلاما نەگىزىندە ءبىر جىل ىشىندە 245 جوباعا قولداۋ كورسەتىلدى. ولاردىڭ اراسىندا سۋبسيديالاۋعا 2،5 ملرد. تەڭگە ءبولىنىپ، 162 جوبانى جۇزەگە اسىرۋعا تىرىسقان. 106،7 ملن. تەڭگەگە 5 جوبا بانك كەپىلدىگىن السا، جۇمىسىن جاڭادان باستاعان جاس كاسىپكەرلەر ءۇشىن 132 ملن.تەڭگە كولەمىندە 41 گرانت ۇسىنىلدى. ودان بولەك، ءۇشىنشى جانە ءتورتىنشى باعىتتار بويىنشا دا كوپتەگەن يگىلىكتى شارالار جۇزەگە اسىرىلدى.
سونداي-اق، وڭىردەگى شاعىن جانە ورتا بيزنەستى دامىتۋ بويىنشا، جاڭا جەكەمەنشىك بالاباقشا اشىلدى. جاڭا بالاباقشانىڭ ىرگەتاسى ىلە اۋدانىندا اشىلىپ وتىر. بەكزات قاسىمبەكوۆا جەكەمەنشىك بالا باقشا اشۋ تۋرالى ۇسىنىسى بار ەكەنىن ايتىپ، ىلە اۋدانىنداعى جۇمىسپەن قامتۋ ورتالىعى ماماندارىنا جەتكىزگەن ەكەن. كوپ ۇزاماي بيزنەس-جوسپارى قولداۋ تاۋىپ، كاسىپكەر «جۇمىسپەن قامتۋ جول كارتاسى – 2020» باعدارلاماسىنىڭ قاتىسۋشىسى اتاندى. ءسويتىپ ءۇش ميلليون تەڭگە كولەمىندە مەملەكەتتىك زاەم الۋعا كاسىپكەردىڭ قولى جەتەدى.
ءسويتىپ، بەكزات قاسىمبەكوۆا قاڭىراپ بوس قالعان عيماراتتى ءوز قاجەتىنە جاراتىپتى. قىسقا مەرزىم ىشىندە الگى عيمارات ادام تانىماستاي وزگەردى. تولىق قالپىنا كەلتىرىلىپ، كىشكەنتاي بۇلدىرشىندەرگە قاجەتتى بارلىق جاعداي جاسالدى. ويىن زالى، مەديتسينالىق پۋنكت، اكىمشىلىك عيماراتى، اسحانا سياقتى بىرنەشە ءبولىم جاڭعىرتىلعان جاڭا عيماراتقا ەركىن سىيىپ تۇر.
بايسەركە اۋىلىنىڭ بالالارىنا قۋانىش سىيلاعان «نيەت-اي» بالاباقشاسى 16 ادامدى جۇمىسپەن قامتىپ وتىر. جالپى الماتى وبلىسىندا 663 مەكتەپكە دەيىنگى مەكەمە جۇمىس ىستەيدى. ولاردىڭ بالالاردى قامتۋ دەڭگەيى بۇگىنگى كۇنگە 58،5 پايىزدى قۇرايدى. اعىمداعى جىلدىڭ وزىندە 12 بالاباقشا سالىنىپ، 11 جەكەمەنشىك بالاباقشا اشىلعان.
بالالاردى مەكتەپكە دەيىنگى تاربيەمەن تولىق قامتۋ جۇمىسى مەملەكەت پەن جەكەمەنشىك ارىپتەستىك بايلانىسىنا نەگىزدەلۋدە. بۇل ورايدا «جۇمىسپەن قامتۋ جول كارتاسى –2020» باعدارلاماسىنىڭ شاراپاتى كاسىپكەرلىگىن دامىتقىسى كەلگەن ۇلكەندەر ءۇشىن دە ەمەس، جاڭا بالاباقشاعا يە بولعان جاس بۇلدىرشىندەرىمىز ءۇشىن دە ءتيىمدى باعدارلاما بولىپ وتىر.

ەدىگە بەكتاس

ۇقساس جاڭالىقتار

Back to top button