Жастардың ұлттық рухын оятқан байқау

Жастардың ұлттық рухын оятқан байқау

Ө.Жолдасбеков атындағы Студенттер сарайында Тәрбие жұмысы жөніндегі департамент және студенттер сенатының ұйымдастыруымен университеттік «Ана тілі аруы» және «Жігіт сұлтаны – 2013» атты республикалық «Ана тілі» басылымымен бірлескен байқаудың ақтық байқауы өтті. «Ана тілі аруы» және «Жігіт сұлтаны – 2013» байқауының басты мақсаты жастар бойында ұлттық тәрбие құндылықтарын дамыту, мемлекеттік тілдің қолданысын кеңейту, жастардың жеке тұлға ретінде үйлесімді дамуына, рухани және жеке кемелденуіне жәрдемдесу, заманауи қыздар мен жігіттердің шығармашылық және жоғары зияткерлік әлеуетін дамыту, сондай-ақ салауатты өмір салтын, табиғи сұлулықты насихаттау. Байқаудың алғашқы кезеңінде университетіміздің 700-ге жуық ұл-қыздары қатысып, өтініш білдірді. Олардың 90-ы 2-ші кезеңге өтті. Екінші кезеңде қатысушылардың интеллектуалды өресі, өнері, білімі сараланып, барлық 13 факультеттен 14 қыз, 14 жігіт таңдалып алынды. Осы уақытқа дейін арулар өз қолдарымен қазақтың ұлттық тағамдарын дайындап, жәрмеңке өткізді. Жиналған ақша қорына жетім балалар үйіне қамқорлық іс-шараларын жүргізді. Ал жігіттер ұлттық, спорттық байқаулар (асық-ойнау, қол күрес, атта шабу және т.б.) бойынша өнер көрсетті. Жігіттердің тек спорттық қабілеті ғана емес, сондай-ақ қоғамдық, яғни үгіт-насихат жұмысы, адамдармен қарым-қатынасы да бағаланды. Ақтық сынға қатысатын жолдама алған қатысушы қыз-жігіттердің мәдени қоғамдық өмірдегі әдебі, мінез-құлқы және өзін ұстауы бағаланды. Енді міне, жарыстың ақтық кезеңі де қызу тартыспен өтті. Ақтық кезеңде қатысушылар сәлемдесу, шеберлік, сұрақ-жауап, өнер сайысы, ұлттық нақыштағы заманауи сән үлгілерін көрсету (дефиле) сынды 5 номинацияда бақ сынады. Сайыста әділ қазылар алқасының төрағасы, «Ана тілі аруы», «Жігіт сұлтаны» жобасының әріптесі «Ана тілі» республикалық газетінің бас редакторының орынбасары Нұрперзент Домбай, ЖОО және жастар ұйымдары жұмыстары жөніндегі бөлімінің басшысы Венера Махамбетқызы, әнші Заир Бегалы, әнші, актер Мұрат Қожа және тағы басқа да белді тұлғалар қазылық жасады. Жарыстың әрбір номинациясы өзіндік тартымдылығы және көрерменге ерекше әсер сыйлауымен ерекшеленсе керек. Әсіресе, өнер сайысындағы қатысушылардың мың құбылған билері мен әсерлі өлең шумақтарын оқулары, ән айтып, күй тартуларының өзі өзгеше сезім сыйлағаны сөзсіз. Сайыс соңында сөз алған ҚазҰУ-дың тәрбие жұмысы жөніндегі департаменттің директоры Меңдігүл Сағатқызы: «Әділ қазылар алқасының шешімі бойынша бүгін ақтық сынға өткен біздің 14 қызымызбен, 14 жігітімізге арнайы номинациялар тағайындалды. Ал, сайыстың шарықтау шегі «Ана тілі аруы» мен «Жігіт сұлтанын» анықтау», – деді. Сайыста «Ана тілі аруы» байқауына қатысқаны үшін қатысушы аруларға «Қайсар ару», «Инабатты ару», «Парасатты ару», «Көрермен көзайымы», «Мейірімді ару», «Өнегелі ару», «Кербез ару», «Дарынды ару», «Қылықты ару», «Байсалды ару», «Көрікті ару», «Нәзік ару», «Ақбілек ару», «Өнерлі ару», ал «Жігіт сұлтаны 2013» байқауына қатысушы жігіттерге «Шешен жігіт», «Жалынды жігіт», «Парасатты жігіт», «Ақын жігіт», «Жігерлі жігіт», «Қайсар жігіт», «Өнерлі жігіт», «Білімді жігіт», «Талантты жігіт», «Қайратты жігіт», «Байсалды жігіт», «Дарынды жігіт», «Келбетті жігіт», «Толағай жігіт» номинацияларымен марапатталды. Ал, «Ана тілі аруы» мен «Жігіт сұлтаны» жеңімпаздарын марапаттауды ҚазҰУ ректоры Ғ. Мұтанов жүргізді. Қорытынды сөз сөйлеген ректор: «Бүгінгі сайыс барлығыңызға ұнады деп ойлаймын. Басқа конкурстардан осы «Ана тілі аруы» мен «Жігіт сұлтаны» конкурсы несімен ерекшеленді деген сұрақты ойланып көрдіңіздер ме? Бұл – ұлттық құндылықтарға негізделетін конкурс. Бұл жерде біздің жақсы дәстүріміз бен жаңа буын жастарымыздың әрі қарай сол дәстүрді жалғастырып, ұрпақтар сабақтастығына негізделеді. Өйткені, конкурс­тар көп, әрқайсысының өз мағынасы бар. Ал, бұл конкурстың негізгі мәні бізді ұлттық нақышта, ұлттық рухта жастарды тәрбиелеу, үлкен тарихтан келе жатқан дәстүрімізді жалғастыру. Біз ұл-қыздарымызды дұрыс бағыттай білсек, осы конкурстың негізгі мақсаты орындалды деп сенуге болады. Жас­тар көп, бірақ, сол жастар – елдің болашағын ойлай ма, сол елдің болашағын дамытуға дайын ба?! Сол кезде осындай конкурс арқылы, жақсы, нақты сұрақтар қою арқылы оларды ойландыра білсек, оларды жұмысқа, іс-қимылға бағыттай білсек, осындай конкурс елге де, болашаққа да керек. Сондықтан осы конкурсты ұйымдастырып отырған азаматтарға, студенттер сенатына, сайысқа қатысқан белсенді студенттерімізге, қатысуға арнайы келген қонақтарымызға, әділ-қазыларға, жас­тарды қолдап отырған демеушілерге шын жүректен алғысымды айтқым келеді. Ал, енді бір жұмадан кейін Тұңғыш Президентіміздің мерекесіне арналған ұлттық студенттік патриот жастар фестивалін ашамыз. Барлықтарыңызды соған шақырамын», – деді. Экономика және бизнес жоғары мектебінің 1 курс магистранты Жалниязов Досхан «Жігіт сұлтаны-2013» атанса, ал филология, әдебиеттану және әлем тілдері факультетінің 4 курс студенті Ізденова Гүлзада «Ана тілі аруы – 2013» атағын иеленіп, ұйымдастырушылар мен демеушілер тарапынан сый-сияпатпен марапатталды.

Досжан БАЛАБЕКҰЛЫ