Әл-Фараби атындағы ҚазҰУ магистранттары Лотарингия университетінің дипломын иеленді. Қос диплом бағдарламасы бойынша білім алғандары туралы құжатты магистранттарға француздық ЖОО президенті Пьер Мюценарт салтанатты түрде табыстады. Ол қос диплом бағдарламасы түлектеріне диплом табыстауға арнайы келген алғашқы университет басшысы болып отыр.
Президент П. Мюценарт бастаған Лотарингия университеті делегациясының ҚазҰУ-ға келуі стратегиялық әріптестікті кеңейту аясында жүзеге асуда. ҚазҰУ ректоры академик Ғалым Мұтановпен кездесу барысында екі жақ ғылыми-білім беру саласындағы әріптестіктің маңызды сұрақтары мен ортақ жобаларды іске асыру жолдарын талқылады.
Франциядан келген қонақтар – Халықаралық және әлеуметтік-экономикалық қарым-қатынас бойынша вице-президент Карл Томбр, Халықаралық және әлеуметтік-экономикалық қарым-қатынас бойынша вице-президенттің арнайы кеңесшісі, «Геоэнергетика» Франция-Қазақстан орталығының директоры Михаил Панфилов, IRENEE зертханасы директорының орынбасары, заң факультеті деканының көмекшісі Пьер Тифин, электр және механика мектебінің индустриалды қарым-қатынастар директорының орынбасары, Лотарингия университетіндегі қайта жаңғыртылатын энергияның зерттеу тобына жауапты Мелика Инаж, әкімшілік-қаржы басқармасы және «Лотарингия-Қазақстан университеті» жобасының жетекшісі Лариса Алле, Францияның Алматы қаласындағы Бас консулы Патрик Ренар, мәдениет және ынтымақтастық мәселелері бойынша кеңесші Йоанн Юрес, университеттік ынтымақтастық бойынша атташе Северин Ван Гастель, «Геоэнергетика» орталығының директоры Пегги Скремин ҚазҰУ ғалымдары, оқытушылары және студенттерімен кездесіп, мұражаймен, оқу орнының инфрақұрылымымен танысты.
«Бұл кездесу екі оқу орны арасындағы жоғары деңгейлі әрі жемісті әріптестікті дәлелдеп отыр. Ол Қазақстан мен Франция мемлекеттері арасындағы стратегиялық әріптестік рухына толықтай сай келеді. Лотарингия университеті – француздық ЖОО арасындағы ҚазҰУ-дің басты серіктестерінің бірі. Екі университет бірге жоғары білікті маман даярлау және инновациялық ғылыми-зерттеу жобаларын жүзеге асыру үшін күш біріктірді», – деді ректор Ғалым Мұтанов.
Президент Пьер Мюценарт екі жақты әріптестіктің маңыздылығын атап өтті. «Екі университет те өз елдерінің үздік оқу орны болып табылады. ҚазҰУ-дің халықаралық байланыс саласында атқарып отырған ауқымды жұмысы мені тәнті етті. Біздің жемісті әріптестігіміз нәтижелерінің бірі – қосдиплом бағдарламасы. Лотарингия университетіне басымдық бере отырып, ҚазҰУ студенттері дұрыс таңдау жасады. Олар өздерінің ғылыми зерттеу жұмыстарын әлемнің үздік зертханаларында жүргізуге мүмкіндік алды. Біздің сапарымыз ҚазҰУ-дің 80 жас мерейтойлық жылында жүзеге асуымен де ерекшеленеді. Университет ұжымына алда да зор жетістіктер мен табыстар тілеймін!» – деді ол.
Өз кезегінде қос диплом иегерлері Қазақстан мен Франция оқытушы-профессорларына шексіз алғыстарын білдірді. Үздік ЖОО-лардан білім алып отырған олар ел игілігі, Отанымыздың өркендеуі үшін қызмет ететіндіктерін жеткізді.
Әйгерім ӘУЕЗХАН