باتىرحان شۇكەنوۆكە ەسكەرتكىش ورناتىلدى

ءانشىنىڭ تۋعان قالاسى قىزىلوردادا سالتاناتتى تۇردە ەسكەرتكىشتىڭ اشىلۋ راسىمى ءوتتى. ءىس-شاراعا باتىرحان شۇكەنوۆتىڭ تۋعان-تۋىسى، دوستارى مەن جەرلەستەرى قاتىستى. سونداي-اق، شاراعا قۇرمەتتى قوناق رەتىندە ءانشىنىڭ جاقىن دوسى بايعالي سەركەباەۆ ارنايى كەلدى.

ءمۇسىننىڭ كەلبەتى ءۇشىن باتىرحان شۇكەنوۆتىڭ «وتان-انا» كليپىندەگى قولىندا ساكسوفون ۇستاپ تۇرعان بەينەسى الىنعان. ەسكەرتكىشتىڭ جالپى بيىكتىگى 3،6 مەتر، ءمۇسىننىڭ بيىكتىگى – 2،2 مەتر، ماتەريالى – قولا; تۇعىردىڭ بيىكتىگى 1،6 مەتر. ءانشىنىڭ اناسى ديليارا شۇكەنوۆا وبلىس باسشىلىعى مەن ءىس-شارانى ۇيىمداستىرۋشىلارعا ءوز ريزاشىلىعىن ءبىلدىردى. «بايقاۋدى ۇيىمداستىرىپ، ەسكەرتكىشتى ورناتۋعا اتسالىسقان بارلىق ازاماتتارعا ۇلكەن راحمەت. ۇلىما ەسكەرتكىش قويىپ، ونىڭ قۇرمەتىنە ساياباقتىڭ اتىن بەرگەندەرىڭىزگە وتە قۋانىشتىمىن»، – دەدى باتىرحان شۇكەنوۆتىڭ اناسى ديليارا شۇكەنوۆا. ءوز كەزەگىندە، بايعالي سەركەباەۆ ەسكەرتكىشتى باتىرحاننىڭ  مۋزىكا ونەرىندە العاش قادام باسقان ورنى – وقۋشىلار سارايىنىڭ ماڭىندا ورناتىلعانى كەزدەيسوق ەمەس دەپ اتاپ ءوتتى. «بۇگىن ءبىز باتىردىڭ تۋعان قالاسىندا، باتىردىڭ ءوزى ارقاشان ساعىنىشپەن ەسكە الىپ، بالالىق شاعىن ەسكە الۋ ءۇشىن قايتىپ بارۋدى ارماندايتىن سۇيىكتى قالاسى قىزىلوردادا جينالعانىمىزعا وتە قۋانىشتىمىن»، –  دەدى سەركەباەۆ. «باتىرحان شۇكەنوۆتىڭ ءار ءانى – ناعىز حيت. ءبىر عانا «وتان-اناسىن» الايىق. العاشقى نوتاسى وينالعان ساتتەن-اق، التاي مەن اتىراۋ اراسىنداعى ۇلان-عايىر دالانى ەرىكسىز كوز الدىڭا اكەلەتىن ءاننىڭ اسەرى ەرەكشە ەمەس پە؟

ەلباسىنىڭ ءوزى ءبىر كەزدەسۋدە انشىگە «وتان-انا» – ەلىمىزدىڭ ەكىنشى ءانۇرانى» دەگەن ەكەن. مىنە، وسىنداي تالانتتى  پەرزەنتىنە سىر ەلى ماڭگىلىك ەسكەرتكىش ورناتىپ، ءىلتيپاتىن ءبىلدىرىپ جاتىر. بۇل ەسكەرتكىش ونىڭ تۋعان قالاسىنىڭ تورىندە جارقىراپ، كوركىنە كورىك قوسارى ءسوزسىز. ونىڭ ۇستىنە وسى ساياباق باتىرحاننىڭ ەسىمىمەن اتالىپ، كەلەشەكتە جاستاردىڭ، ءانشىنى قۇرمەتتەيتىن تۇرعىنداردىڭ جاقسى ءبىر دەمالىس ورنىنا اينالار دەپ سەنەمىز. سىر بويىنىڭ تالانتتى ۇلى، ونەر تارلانى باتىرحان شۇكەنوۆتىڭ ەسىمى قازاقستاندىقتاردىڭ جۇرەگىندە ماڭگى ساقتالادى»، – دەدى وبلىس اكىمىنىڭ ورىنباسارى رۋسلان رۇستەموۆ. ەسكەرتكىشتىڭ اۆتورى – ءمۇسىنشى مۇرات مانسۇروۆ. ول جاساعان ەسكەرتكىشتىڭ جوباسى 2017 جىلى بايقاۋعا قاتىسقان 8 جوبانىڭ ىشىندە ۇزدىك اتاندى. ەسكەرتكىش قىزىلوردا وبلىسى اكىمدىگىنىڭ تاپسىرماسىمەن ورىندالدى. ەستەرىڭىزگە سالا كەتەيىك، مۇرات مانسۇروۆ – «قازاق ەلى»، «ماڭگىلىك ەل»، «كەرەي-جانىبەك» مونۋمەنتتەرىنىڭ اۆتورى. ايتا كەتەيىك، باتىرحان شۇكەنوۆتىڭ تۋعان كۇنى قارساڭىندا وبلىس اكىمدىگىنىڭ قولداۋىمەن قىزىلوردادا ءىى «وتان انا» رەسپۋبليكالىق انشىلەر بايقاۋى وتكىزىلىپ، اس بەرىلدى. سونداي-اق، كەشكە «وتان انا» بايقاۋىنىڭ جەڭىمپازدارى مەن قازاقستاندىق ەسترادا جۇلدىزدارى ديلناز احماديەۆا، رينات گايسين، ءالي وقاپوۆ پەن رۇستەم نۇرجىگىتتەردىڭ قاتىسۋىمەن گالا-كونتسەرت ۇيىمداستىرىلادى. گالا-كونتسەرت بارىسىندا باتىرحان شۇكەنوۆتىڭ رەپەرتۋارىنان تانىمال اندەر ورىندالاتىن بولادى.

ۇقساس جاڭالىقتار

Back to top button