تۋريستەر تاڭداي قاققان ەتنوفەستيۆال

بۋرابايدا «رۋحاني جاڭعىرۋ» باعدارلاماسى شەڭبەرىندە «اتادان قالعان اسىل مۇرا» اتتى  العاشقى ەتنوفەستيۆال ۇيىمداستىرىلدى. ۇلتتىق  سيپاتتاعى  شاراعا  وڭىردەگى  بارلىق اۋداندار قاتىستى.

وسكەلەڭ ۇرپاق ءۇشىن اسا قاجەتتى ەتنوفەستيۆال ەندى ءداستۇرلى تۇردە جىل سايىن بۋراباي باۋرايىندا ۇيىمداستىرىلاتىن بولادى. ال بيىلعى ەتنوفەستيۆالگە جينالعان جۇرتشىلىق ەڭ اۋەلى ابىلاي حان الاڭىندا كوشپەندىلەر وركەنيەتىنىڭ كورىنىسىن تاماشالادى. الاڭعا تىگىلگەن قازاقتىڭ كيىز ۇيلەرىندە حالقىمىزدىڭ سالت-ءداستۇرى مەن ادەت-عۇرىپتارى كورسەتىلدى. سونداي-اق، جەرگىلىكتى تۇرعىندار مەن تۋريستەر قولونەر بۇيىمدارىنىڭ كورمەسىن تاماشالادى. بۇل شارا كوپشىلىككە قازاقتىڭ سالت-داستۇرلەرىن، ۇلتتىق ويىندارىن تانىستىرعان مەرەكەگە اينالدى. جاستار التىباقان تەۋىپ، بالالار ءتۇرلى ۇلتتىق ويىندار وينادى. ۇيىمداستىرۋشىلار بۇل شاراعا كىشكەنتاي بۇلدىرشىندەردىڭ كوپتەپ قاتىسقانىنا ريزا. ويتكەنى قازاقتىڭ ۇلتتىق قۇندىلىقتارىن بولاشاققا جالعار وسى بالالار.

ەتنواۋىلدا ۇيىمداستىرىلعان شارانى شەتەلدىك قوناقتار ەرەكشە تاڭدانىسپەن تاماشالادى. تۋريستەر قازاقتىڭ ۇلتتىق كيىمدەرىن جوعارى باعالادى. ويۋ-ورنەكتەردىڭ اسەمدىگىنە تاڭدانعان شەتەلدىك قوناقتار قازاقتىڭ ۇلتتىق تاعامدارىنان دا ءدام تاتىپ كوردى. ودان بولەك، تۋريستەر قازاق حالقىنىڭ قوناقجايلىلىعىنا قايران قالعاندىقتارىن جەتكىزدى.

ۇقساس جاڭالىقتار

Back to top button